Problema di coriente a sigui, den por lo menos tres districto riba tres diferente momento

ORANJESTAD – Problemanan di coriente ta sigui azota nos isla. Diahuebs sigur no tabata un bon dia pa varios districto y bario rond di Aruba. Specificamente, na tres diferente occasion, tabatin interupcion di coriente y cada uno pa un motibo diferente. Cual cu sea e problema, tabatin varios bario cu a experencia esaki no uno pero hasta dos biaha riba e mesun dia, y no tabata nada contento. E prome tabata na San Nicolas, despues Santa Cruz/Macuarima tabata na beurt, y finalmente Savaneta. 

SAN NICOLAS

E prome interupcion a bin diahuebs mainta trempan. Specificamente clientenan den e area di Lagoville y vecindario unda cu tabatin un problema den e distribucion di coriente den e area aki. A resulta cu e causa di e interupcion tabata debi na un fayo riba un kabel subteraneo. Pa 8:45am tur hende tabatin coriente bek

MACUARIMA Y SANTA CRUZ

Atardi pa anochi, tabatin otro melding di problema di coriente, e biaha aki Macuarima y besindario na Santa Cruz. Aki un accidente di truck involviendo liñanan di distribucion di coriente tabata e causa. E truck a hala y ranca no menos cu 7 poste di coriente. Un trabou grandi mirando cu Elmar a avisa cu tabata

premira un duracion di mas o menos 4 pa 5 ora pa por realisa e trabou di reparacion riba 7 poste di coriente den e area directamente afecta na Macuarima.Debi na hopi daño material, mester a sigura cu e area ta limpi di tur obheto causa pa e accidente pa por a eherce e trabou di reparacion. E trabou a inclui un analisis di e situacion y crea un lista di material necesario, e instalacion di un poste nobo di coriente y tur e componentenan di coriente, y zwaai e liñanan di distribucion. 

SAVANETA

Mas anochi, tabatin un situacion mas. E biaha aki, ta Savaneta, Rooi Koochi tabata na turno. E biaha aki tabata un problema den e distribucion di coriente den e area aki. Pa algo despues di 1’or di diabierna marduga, tur hende afecta tabatin coriente bek. 

RECLAMO Y DISGUSTO

E reclamo y disgusto tabata grandi atrobe, sigur pa esnan cu a keda afecta por lo menos 2 biaha riba un dia. Y pa no lubida e chens pa ekipo daña. E situacion aki lo no cambia por lo pronto manera cu a keda anuncia recientemente durante un conferencia di prensa, unda cu a bisa cu lo dura un tempo ainda prome cu e situacion drecha na Aruba. E problema ta cu a laga e tempo ey, habri pues no tin indicacion cuanto tempo e problemanan lo dura.