Pisas: Aeropuerto y oficina di turismo di Corsou ta bai purba yuda pasaheronan di JetAir

WILLEMSTAD - Curaçao Airport Holding (CAH) i Ofisina di Turismo (CTB) ta bai purba di yuda pasaheronan perhudiká di JetAir. Entre tantu e dos instansianan di gobièrnu aki ta bai wak kon pa trese personanan pegá den eksterior Kòrsou i pa esnan pegá na Kòrsou, por bai kas bèk. Esaki ta loke ku promé minister sr. Gilmar Pisas a anunsiá ayera na prensa. El a trese esaki dilanti despues di a sinta ku representantenan di e pasaheronan di JetAir perhudiká.

Promé minister Pisas a indiká ku el a bai hasi sierto ehersisio, i un di nan ta kon tòg e grupo di sòftbòl por bula ku otro aerolínea, esaki no ta bira posibel. E di dos punto ta ku gobièrnu ke wak e posibilidat kiko por hasi pa intermediá pa aspekto finansiero. Relashoná ku esaki departamento di finansa a trese dilanti pa yuda hendenan ku ticket esei no ta faktibel. Entre tantu CAH a hasi evaluashon di hendenan pegá den eksterior, i ta trata di alrededor di 70 persona ku ta pegá na Jamaica, Colombia, Aruba i St. Maarten. CAH i CTB a keda aserká pa yuda e personanan pa yega kas, segun sr. Pisas.

Ayera mainta sr. Pisas a sita e curatornan di JetAir pa sinta i papia riba e situashon, pero ta mañan djabièrnè esaki por sosodé.

E gastunan di tur pasahero perhudiká ku a registrá ta alrededor di 450 mil florin di hendenan ku tin di biaha di awor aki te pa luna di ougùstùs. Promé minister a bisa di ta bai sinta ku CAH, CTB komo representante di pasaheronan pa wak kon ta yega na solushon. Finalmente sr. Pisas a bisa e situashon ta hopi difísil.

Pa loke ta trata e pasaheronan perhudiká, e representante di e timnan di sòftbòl a trese dilanti ku e torneo di sòftbòl Dutch Caribbean ku mester a tuma lugá pa di 11 biaha e aña aki na St. Maarten a keda kanselá debí na e situashon aki. E pasaheronan perhudiká a pidi pa bai hasi investigashon serka e gerensia relashoná ku sumanan grandi ku a tuma te na último serka pasaheronan. Manera djasabra ta pidi un mener pa paga 20 mil florin si no e ta pèrdè su ticketnan. Djasabra atardi te ainda otro persona por a kumpra ticket. Pa nan e loke gerensia a hasi ta di mala fe. Nan ta spera tin hende lo sali pa nan. Paso ta un abusu di pueblo kaminda spesialmente e timnan di sòftbòl a hasi “fundraising” pa yega na ticket. E representantenan di e pasaheronan perhudiká di JetAir a pidi tur hende perhudiká pa mèldu na claimjetair@gmail.com, p’asina nan por dokumentá tur hende perhudiká i pa tin nòmber ora sinta ku gobièrnu i curator. NOTA: Texto ta scirbi den Papiamento fonetico di Corsou.