Anfernee Emerencia a bolbe Aruba co-piloteando avion di American Airlines

ORANJESTAD – E co-piloto Arubiano cu dos aña pasa tabata riba Noticiacla ora cu e la bira e prome piloto Arubiano pa traha pa American Airlines, Anfernee Emerenciana, diaranson a bolbe aparece riba nos portal. E biaha aki como cu desde cu e la cuminsa traha cu American Airlines na maart di 2022, e la co-pilotea un avion di e compania, cu destinacion Aruba. Un logro personal grandi y un soño realisa pa Emerenciana, y tambe cu a yena hopi Arubiano cu alegria y orguyo. 

E DIA DI AWE

E dia a cuminsa normal p’e, te ora cu e la haya sa na trabou, cu su schedule a cambia y cu enbez di bula pa Barbados, su destinacion tabata Aruba. Algo cu e la purba planea for di dia cu e la join e aeroliña. E la yama su mayornan, di cual e tata ta conocido comentarista deportivo Verio Emerenciana, tempran, di e noticia. Aeropuerto tambe a haya sa y a core organisa un yegada diferente cu cooperacion di e.o. oficina di turismo di Aruba. Na su yegada, e la ricibi e sorpresa topando cu no solamente famia pero tambe e famia di aeropuerto cu a ricibie, hunto cu prensa local. 

SU EMPLEO

Tabata dos aña pasa cu Noticiacla tabata un di e prome nan cu a publica e noticia ora cu Emerenciana a bira piloto pa e aeroliña mas grandi di mundo, esta American Airlines. Cu esaki, un soño di dje ta keda realisa, manera e mes a expresa e siman ey. Emerenciana a bira piloto pa bula e avionan tipo Boeing 737 pa e aeroliña. Y a spera cu pronto e lo por transporta pasaheronan Arubiano riba e avionan. 

SU SOÑO Y LOGRO

Manera e mes ta bisa, for di chikito e la para na heki di aeropuerto Reina Beatrix soñando cu spera un dia e por a baha un di e avion grandi nan na Aruba. “ Cu apenas 17 aña mi a bai studia afo pa asina cuminsa cu e trajecto pa yega na e momento aki” e ta sigui conta dos aña pasa. “E siman aki mi a bira oficialmente un piloot pa e aeroliña mas grandi di mundo, American Airlines,  bulando e Boeing 737”. E la gradici su mayornan y famia pa nan sosten durante tur aña nan aki. “Pronto mi lo por transporta pasahero nan Arubiano cu hopi orguyo ariba vuelo nan di American Airlines” e ta finalisa bisando, riba su pagina di Facebook e tempo ey. Ta conoci cu tin mas Arubiano bulando pa aeroliñanan internacional, pero esaki ta e prome (te asina leu cu ta conoci) cu ta traha pa e compania como piloto.