Corte a declara aeroliña JetAir den estado di bancarota

WILLEMSTAD – Corte di prome instancia diamars mainta a declara e aeroliña di Corsou, comercialmente conoci como JetAir failliet. Esaki tabata riba peticion di e propio compania cu e huez a declara e companianan  United Caribbean Airlines B.V. y JetAir Caribbean B.V., hunto operando bou di e nomber comercial JetAir. Corte a apunta mr. C.M. van Liere y mr. R.J. Vriezen como curatornan.

JETAIR

JetAir tabata ofrece buelonan comercial y charter di y pa Caribe y Sur America. E compania a cuminsa na 2019 net prome cu e pandemia, y a afecta e compania severamente. E compania no a logra di bolter e situacion negativo, cu a pone cu no tabatin fondo pa e mantenimiento di avion, cu ta e parti mas costoso di un aeroliña. 

FASE

E compania a opta e ora pa saca un di su dos avionan for di servicio y usa e avion ey p.a haya pieza. Asina mes no por a logra mantene e un solo avion bulando, y cu un debe acumula di 2 miyon florin den prome 4 luna di e aña aki, a dicidi di sali di esaki pidiendo faillisement propio. 

SITUACION

E problema ta cu e aeroliña te cu e siman aki tabata den operacion cu pasaheronan riba varios destinacion, y otronan cu a cumpra pasashi pa buelonan den proximo lunanan incluyendo vacacion. Esey a causa un problema serio unda cu personanan afecta a bay e oficinanan y causa problema cu a rekeri asistencia policial.