Courtyard by Marriott Curaçao a habri su portanan

WILLEMSTAD  – Courtyard by Marriott®, parti di e portafolio di Marriott Bonvoy ku 32 otro marka di hotèl, a habri su portanan ofisialmente ayera na Kòrsou. E hotèl nobo, situá na Pater Euwensweg 11 na Otrobanda, ta ofresé 150 kamber i 2 suite. E hotèl ta ofresé un eksperensia moderno i fleksibel, den kual e diseño ta reflehá diferente elemento di naturalesa i kultura di Kòrsou. E hotèl ta wòrdu eksplotá komo un frankisia di Courtyard by Marriott, propiedat di CMC Real Estate i manehá pa Highgate.

Durante di un apertura masha spesial por a konta ku presensia di henter e tim, e desaroyadó nan di proyekto, doñonan, partnernan finansiero, kaminda ku  GM Ernst van Zuthpen, a suprayá e trabou duru i dediká di su tim i tambe invitá tur hende pa pronto eksperensiá e hotèl.

Na e okashon aki Alberto da Costa Figueira di CMC Operations N.V. a ekspresá su entusiasmo riba e meta lográ, “Courtyard by Marriott Curaçao ta representá e sinergia perfekto entre étika empresarial di Courtyard i e karakter bibu i kultura di Kòrsou. Nos a krea un espasio na unda tur huéspet por sinti nan liber, sea ta pa negoshi òf fakansi, di manera ku nan por eksperensiá nos kultura, disfrutá di fasilidatnan ‘top class’ i e servisio eksepshonal di Marriott. Courtyard Curaçao ta un lugá na unda tur hende ta bon biní. E sitio na Kòrsou pa un eksperensia di huéspet úniko den un ambiente sorprendente.”, di akuerdo ku Costa Figueira.

Ko-propietario Gilbert Ricardo di Stichting Particulier Fonds Otrobanda a hiba palabra nèt despues i tabata emoshoná di mira e forsa i e resiliensia di henter e tim di Courtyard Curaçao i kon spesial e ta pa Courtyard by Marriott Curaçao por operá bou di bandera lokal. E ta orguyoso riba e resultado. “E ta surpasá tur hende su espektativa,” asina Ricardo a bisa.

Ulrich Dalnoot, di Vidanova Pensioen Fonds tambe a hiba palabra, i a elaborá riba e kolaborashon fantástiko ku tabatin entre e diferente partnernan finansiero di nos isla ku huntu a pèrkurá ku awe Courtyard Curaçao por a habri su portanan. “Nos ta partikularmente orguyoso ku nos por yama nos mes ko-propietario di Courtyard Curaçao; un proyekto na unda pashon lokal i eksperensia internashonal ta bini huntu maraviosamente. Nos ta mira ku hopi konfiansa riba futuro di e hotèl úniko aki i ta brinda riba mas kolaborashon fruktífero”, di akuerdo ku Dalnoot. NOTA: Texto ta scirbi den Papiamento fonetico di Corsou.