Ministerio Publico a laga e curpa di chauffeur di Arubus liber

ORANJESTAD – Ministerio Publico a laga e curpa liber di e chauffeur di Arubus, Jeffrey Duinkerk diaranson atardi, y a entrega esaki na famianan. Ministerio Publico a confirma na NoticiaCla.com cu e autopsia conduci riba e curpa, “no a duna ningun indicacion cu un hecho castigabel lo a hibe na su morto”. E autopsia ta solamente pa determina si e morto tabatin algo castigabel cu a causa morto di e persona respectivo, si na prome instante tin duda. Unabes cu a kita e duda, ta entrega e curpa bek. E patologo den e caso aki ta busca cualkier indicacion cu lo tabatin algo ‘intencional’ cu a causa e morto. A splica tambe cu, mescos ta sosode den otro casonan, si famianan kier sa exactamente di kico e persona a muri, por haci un di dos autopsia, cu ta determina e causa exacto pa cual e persona a fayece. Esey no ta tarea di ministerio publico.

E ACCIDENTE

Tabata dialuna anochi, cu polis, ambulance y materialenwagen di brandweer a wordo manda cu urgencia na e crusada Alhambra Casino dialuna anochi pa un accident cu un bus di Arubus. E chauffeur di e bus lo a perde control y a subi e barancanan na e crusada di Alhambra Casino. A raporta tambe cu tabatin varios persona herida.

BUS RIBA BARANCA

Na yegada nan ta bin topa enberdad cu un bus di Arubus pega riba algun baranca. Tabata tin mas o menos 20 pasahero den e bus, di cual varios tabata levemente herida. Ambulance a trata nan na e sitio, y tabata visto cu e chauffeur di e bus tabata esun mas grave, y tabata pega den e bus. Mesora e personal di brandweer a cuminsa cu e trabounan necesario pa libera e chauffeur. Pero na mes momento a bin ripara cu e chauffeur no tabata duna señal mas di bida. Lamentablemente cu no obstante tur esfuerso, cu pa 11:40pm, Dr. Thuis cu a presenta na e sitio, a constata morto di Jeffrey Irvin Duinkerk, naci na Aruba dia 1 di april 1970 y tabata biba na Siouxstraat # 16. Fiscal mr. Zondervaan a tuma e curpa den beslag pa mas investigacion.

KICO A SOSODE

Na e sitio nan a bin compronde cu e bus tabata biniendo di panort, y cu e chauffeur probablemente lo a bira malo na stuur, cu consecuencia cu e el a perde control, subi algun baranca cu tin na e crusada di Alhambra, y laga e bus keda pega riba e barancanan. Informacion ricibi na e sitio ta bisa cu e chauffeur ta di fam Duinkerk. Departamento tecnico di polis tambe a bay na e sitio pa haci investigacion. Slachtofferhulp tambe a wordo pidi na e sitio mirando cu tin familiares di e defunto cu a yega na e sitio. E crusada di Alhambra lo keda pa oranan largo cera pa asina brandweer y polis por haci nan trabounan necesario. NoticiaCla.com ta manda palabra di pesame na famianan di e fayecido.