Franken: Nervio a pone Aruba perde contra Barbados 2-0

ORANJESTAD – E ‘momentum’ crea pa ‘tur arubiano bay wak e wega diaranson anochi,’ y e hype di ‘nos ta Aruba!’ a funciona. E la yena e stadion na Aruba completamente berdad. Pero mes momento e mesun stadion yen, a afecta e hungadornan di seleccion di Aruba di un forma negativo, cu ta un di e motibonan cu nan a perde 2-0 contra Barbados diaranson anochi. Esey ta e splicacion di e entrenador principal di e seleccion di Aruba, Giovanni Franken na NoticiaCla.com durante un conferencia di prensa despues di e derota.

GOALNAN A ‘DRECHA COS’

E yeno total di stadion Guillermo Prospero Trinidad a haci e hungadornan di Aruba asina nervioso cu nan no por a hunga nan wega e prome 20 minuut. Ironicamente, ta e dos goalnan contra den e prome 20 minuut, a ‘saca’ e hungadornan for di e ‘fantasia’ y trece nan bek na realidad. “Ta despues di e dos goalnan, nos a cuminsa hunga nos wega” Franken a sigui bisa. “E hungadornan a realisa cu, boom, nos mester hunga futbol!”. Y ta for di e momento ey, e wega mes cu nan a train pe, a cuminsa. Solamente cu e tabata un poco laat.

BON WEGA

E ekipo a hunga relativamente bon, y a haya basta chens pa score. Barbados a hunga hopi habri segun Franken, cu a pone cu e chensnan tabat’ey. Solamente, cu e goalnan no a cay. “Mi ta sigur cu si nos a hinca un goal, nos lo a empata e wega” Franken a sigui bisa, argumentando cu esey lo a ‘jumpstart’ nan momento mas y pone nan hunga e wega cu nan a prepara pe.

PRESION

“Nos a prepara hopi pa e wega aki. Pero ora cu e hungadornan a mira e stadion yen, e presion a domina nan. Nan tabata den ‘espacio’ e prome 10 minuut sigur. Nan a cuminsa zweef y no por a hunga”. Awor cu e score aki na ta cay atras, aunke cu e tin tur confiansa cu nan por gana Barbados. “Si e (Barbados) hunga asina diadomingo, nos por gana nan”, Franken a bisa, indicando cu Aruba lo no tin e presion cu e tabatin diaranson anochi pa hunga na cas, dilanti asina un publico grandi. “Den 82 aña esaki no a sosode. Un publico asina grandi pa wak bo hunga” Franken a finalisa bisando.

BARBADOS

E director tecnico di e ekipo di Barbados, un brasilero experencia, a mustra cu ekipo di Aruba a hunga bon, pero cu e ta contento cu su ekipo a gana e 3 puntonan. “Nos a hunga manera cu nos a entrena” e la bisa. Sinembargo e la admiti cu e ekipo no ta completo. “Tin algun hungador cu ta lesiona y cu no por a biaha cu nos”. Mes momento el a haya e biahe largo, y esey a afecta e muchanan. “Nan ta cansa” e entrenador a bisa. E hecho cu nan ta bay bek cas, no necesariamente ta un bentaha pa nan. Esaki pasobra nan tin cu bolbe biaha, y ta e ‘esperanan’ largo na aeropuerto etc, cu ta afecta e hungadornan sigur. Pa Aruba, e tabatin elogio so, y a bisa cu e ekipo ta uno bon, cu a demostra algun bon hugada.