Mester inverti 40 miyon dollar y tarda 2 aña pa e situacion di coriente na St Maarten drecha

PHILLIPSBURG – Lo por dura 2 aña prome cu e problema di coriente na St Maarten ta algo di pasado. Asina e compania di coriente NV GEBE A informa diaranson durante di un conferencia di prensa. E plan di e compania ta pa aumenta e capacidad di produccion cu 27 megawatt. Financieramente esaki lo costa e compania entre 35 pa 40 miyon dollar, y for di momento cu firma e acuerdo, e trabou y ehecucion, esaki lo dura entre 18 pa 24 luna. Pues realisticamente, por dura entre un aña y mei pa dos aña prome cu e isla su situacion di coriente ta optimal.

TEMPORALMENTE 

Pa un solucion inmediato y a termino corto, GEBE a revisa un opcion anteriormente considera, cu ta pa huur unidadnan portatil cu ta genera electricidad. E unidadnan aki por wordo haya via un asina yama barge, of container cu por produci un 20 megawatt adicional, pa asina resolve e falta di 1 megawatt aworaki.  E plan aki ta tuma entre 7 dia pa 10 siman pa wordo materialisa, depende cua di e opcionan scohe. Tur esaki lo elimina e situacion di schakeling di coriente. Aworaki tin e plan di schakeling unda cu barionan ta haya cada bes algun ora di coriente. Varios pais a cuminsa alerta nan ciudadanonan cu ta bishita St Maarten, pa tene cuenta cu e situacion di coriente riba e isla.