Partido ‘impopular’ pa islanan di Reino, PVV ta haya cartera di Asuntonan di Reino

DEN HAAG – E partido politico cu no ta gusta e islanan ABC, esta partido PVV di Geert Wilders ta haya e cartera di secretario di estado pa Asuntonan di Reino Hulandes, esta e cartera cu aworaki Alexandra van Huffelen (D66) tin. Con esaki ta bay desaroya, no ta conoci, pero ta conoci cu e partido PVV no ta ‘stima’ nos aki banda y esaki por tin su consecuencia, aunke ta prematuro pa wak si esaki enberdad ta traduci na un relacion menos positivo. 

REPARTICION DI CARTERA

Manera ta conoci, ayera a bira conoci con e reparticion di cartera di minister y secretario di estado lo ta den e gabinete nobo Hulandes. Aki a bira conoci cu PVV ta haya 5 minister, VVD y NSC cada un 4 y BBB 1 minister.

PVV

Loke ta hala atencion ta cu PVV di Geert Wilders, ta produci e secretario di estado pa Asuntonan Interno, osea BZK bou di cual ta cay e cartera di Reino cu aworaki ta den man di Alexandra van Huffelen. Di otro banda e minister mes, di Asuntonan Interno ta cay si bou di e partido Nieuw Sociaal Contract (NSC) di Pieter Omtzigt. Esey por nifica un menguacion di situacion.