E cruzada popular na Wayaca/Primavera ta sigui haya accidente di auto

ORANJESTAD – Un biaha mas na e cruzada ‘popular’ na Wayaca/Primavera, dos auto a keda accidenta. Esaki ta di dos biaha den un siman cu tin un accidente na e cruzada aki.  Habitantenan den e bario a bolbe keha riba e asunto aki, mirando cu e cruzada aki ta keda un problema. Awe mainta, hasta un ex agente policial hopi conoci, cu ta biba den e caya, a comenta cu no mester pone ‘sleeping police’ esta e drempel, sino un rotonde y cu e la haci tres peticion pero niun reaccion. Den pasado ex minister Otmar Oduber cu tabata minister encarga cu infrastructura, tambe a priminti accion, pero nada. “Nos a haya solamente poco verf y borchi”, e polis awe mainta a bolbe comenta. E cruzada hopi tempo atras tabata te hasta e sitio di un accidente fatal. Pero te cu awe, ta simplemente bisa cu automobilistanan mester pone miho atencion y te eynan.