St Eustatius cu aanwijzing, pa incumplimento di consehonan CFT

DEN HAAG – St Eustatius ta haya un aanwijzing di minister Ronald Plasterk pa por garantisa y duna contenido na e consehonan di College Financieel Toezicht riba e presupuesto y e maneho financiero di e isla. Asina e oficina di e minister a bisa gobierno di e isla den un carta diaranson atardi. Segun Plasterk, aña pasa e isla a sufri deficit cuantioso y tambe pa 2015 e bista financiero ta preocupante. “Awor medidanan profundo ta necesario pa por haya e gastonan bou di control atrobe” Plasterk ta sigui bisa. “Pa evita cu e presupuesto mientrastanto deteriora atrobe, e isla no por haci compromisonan financiero nobo mas!”.

GOBIERNO DESFUNCIONAL

E desaroyonan financiero riba tereno financiero ta un consecuencia di gobierno desfuncional di e isla. E calidad di e gobernacion ta na peliger. Como ehempel, ta papia di nombramentonan continuo sin cu esaki ta presupuesta. E representante di Reino lo haci uso di su poder legal pa eherce supervision gubernamental riba e isla. Esaki ta cay bou di e ley Openbare Lichamen Bonaire, St Eustatius y Saba. Bou di e mando di e representante di Reino y gobierno di e isla lo hinca un plan den otro cu tin cu pone ordo atrobe riba e situacion financiero. Esaki ta e carta cu Plasterk a manda pa gobierno di St Eustatius awe.