Seleccion di Aruba cla pa enfrenta Barbados awe nochi

ORANJESTAD – Tur cos ta cla pa e ekipo nacional di futbol di Aruba, topa esun di Barbados awe nochi 8’or riba veld di Guillermo Prospero Trinidad. E emocionan ta halto, interes total, y esey ta loke tur hende ta papiando awe. Y e ekipo di Aruba tin un solo meta: hunga e wega como si fuera ta mundial nan ta hungando, y drenta den e top 100 mihonan di FIFA. Esey ta e meta principal awor pa e ekipo y su entrenadornan. Barbabos mientrastanto a yega Aruba den fin di siman, y tambe no kier entrega y ta haci tur cos pa nan bay cu e victoria.

E TRAYECTORIA

Despues di awe, ambos ekipo ta biaha pa Barbados pa enfrenta otro un biaha mas diadomingo, y asina e weganan ta continua. Si Aruba gana ambos wega, tin un wega mas pa hunga pa despues drenta e seccion di 12 wega, di cual e ultimo 4 ekiponan cu keda, ta bay Rusia. Pues e caminda ta largo ainda pero e speransa, ta ultimo loke nan ta perde. NoticiaCla.com ta desea e ekipo di Aruba tur exito di mundo y cu nan mantene e honor di Aruba halto. Foto cortesia ZOOMARUBA.