WEB no ta prepara pa un calamidad

ORANJESTAD – Nos compania di utilidad WEB no ta prepara pa calamidad. Segun Caribisch Netwerk ta raporta, e fabrica di 80 aña, ainda ta analisando e risico, mas specifico esnan cu tin un impacto riba medio ambiente.

DERAME PETROLIO

CN ta raporta tambe riba e fayo di un tubo na februari ultimo cu a resulta den un leak di petrolio y cu a sali den e awa condensa di WEB cu ta drenta den laman directo. WEB no a premira esaki y no tabatin un sistema di detecta esaki tampoco, cu a pone cu a dura por lo menos un dia prome cu a tuma accion.

DECISION

E tempo ey director di WEB Oslin Boekhoudt a indica cu e buraco den e pipa tabata debi cu e tabata putri. “WEB ta tuma decisionnan kico y ki ora mester haci mantencion. E ora ta ripara cu a tuma cierto decisionnan cu a resulta di ta laat. Manera e pipa putri. E compania ta trahando riba un analisis di e risico pa asina bin cu un plan di prevencion”

OBLIGACION

Actualmente e compania no ta obliga pa haci tal, pasobra Aruba no tin un ley di medio ambiente cu por forza companianan pa tuma medida di prevencion y bin cu un plan di accion. Esaki a keda confirma pa e director di Naturalesa y Medio Ambiente Gisbert Boekhoudt. E ley lo por obliga e companianan pa raporta incidentenan. Algo cu WEB no a haci, tanto na e momento di e   derame di petrolio , como e morto repentino di un cantidad di pisca dos siman despues, segun Boekhoudt.

RAPORTA

WEB lo kier raporta, pero ta bisa cu e no sa kico e reglanan pa esey ta. E director ta puntra su mes si tin un protocol pa esey. E ta bisa tambe cu un dicho plan di prevencion y of combatimento, no mester bin solamente di WEB sino tambe di otro instancianan cu ta crea e desperdicio, manera riba otro islanan.

INVESTIGACION PENAL

Actualmente tin dos investigacionnan penal canando contra WEB. Uno ta riba e derame di petrolio y e otro riba e morto di piscanan. Directie Natuur y Milue a bisa cu despues di su analisa, cu anna constata cu e morto di e piscanan tabata culpa di WEB. Pa Caribisch Netwerk. Autor : Sharina Henriquez