Nicky Jam ta confirma pa Hak’e Curaçao Summer Festival

WILLEMSTAD - Djabièrnè atardi a duna é ’update’ di Hak’e Curaçao Summer Festival ku tur hende a bin ta spera! Nicky Jam ta konfirmá pa e di dos dia dje festival. Esaki riba su mes ta algu grandi pa Kòrsou. Posiblemente e presentashon di Nicky Jam lo por ta te asta un di su últimonan den Caribe konsiderando ku e kantante a anunsiá su retiro aña pasá. E tim di Hak’e Curaçao Summer Festival tabata kontentu di porfin anunsiá Nicky Jam, “E’la dura un poko mas ku a fèrwagt; e kosnan aki ta tuma tempu. Ademas, eksperensia ta siña nos ku tur kos bon, tin bes ta tarda pa yega. Nos ta hopi satisfecho i orguyoso di por anunsiá e sensashonal artista aki den nos line-up pa Hak’e Curaçao Summer Festival.”

Nicky Jam ta un mega artista ku un espektakular 125 nominashon i ku mas di 39 premio Latin Billboard Music Awards/ Latin AMAs/ Lo Nuestro. Un karera impreshonante i un sin fin di hit inkluyendo El Amante, Hasta El Amanecer, El Perdón, Travesuras, Fan de Tus Fotos, Perro Fiel i muchu mas. Tur hende konosé kansionnan di Nicky Jam! Públiko lo kanta i disfrutá henter anochi.

E festival ta programá p’e fin di luna aki i mester bisa ku públiko ta wardando e fin di siman di 28 i 29 di yüni benidero ku hopi entusiasmo. Karchinan a sigui bende nònstòp demostrando ku fanátikonan tin konfiansa den e produkto, konsepto i organisashon. Manchi Harms ta bisa, “Nos ta gradisí nos públiko fiel ku a sostené nos semper. Awor, ku Nicky Jam aserka nos ta klá pa selebrá un otro edishon di Hak’e Curaçao Summer Festival.” For di djabièrnè atardi a ‘update’ e website ofisial www.hakecuracao.com di manera ku bishitantenan internashonal tambe ta informá.

Dianan 28 i 29 di yüni próksimo lo tin un goso total ku presentashon di Nicky Jam, Servando y Florentino, Olga Tañón, Tributo Al Merengue feat. Fernando Villalona, Wilfrido Vargas i Kinito Mendez. Tambe lo tin presentashon di Kòrsou su propio talentonan Axel & Orchestra ku despues di hopi petishon di públiko ta bolbe esenario di HCSF i e aña aki lo tin presentashon di e sensashon musikal NSTYPLY! NOTA: E texto ta scirbi den Papiamento fonetico di Corsou.