Aruba a duna Corsou bataya, pero a cay venci na final 2-0

ORANJESTAD – Dilanti di un publico di 3.000 persona, e seleccion nacional di futbol di Aruba a duna e seleccion di Corsou basta dolor di cabez diasabra anochi, aunke cu nan a cay venci 2-0 finalmente cu goal di Xander Seferina (ADO DEN HAAG) y Leandro Bacuna (WATFORD FC). Corsou a bin cu e pensamento cu nan lo a score mucho mas gol, segun e entrenador Dick Advocaat riba pregunta di Noticiacla despues di e wega. “Aruba no a haci e trabou facil pa nos” Advocaat a bisa despues di e wega. Ambos gol di Corsou a bin den e di dos mitar, pero esaki sigur no tabata facil pa Corsou. Segun e entrenador di Aruba, Marvic Bermudez, nan plan di wega tabata pa frustra e intencion di Corsou, cual intento a yuda hopi bon. E la referi na e prome mitar di e wega unda cu por a nota frustracion di e hungadornan di Corsou cu a hasta cuminsa discuti cu otro na cierto momento. Segun Bermudez, no tin cu lubida cu e seleccion di Corsou tin 23 hungador professional y nan nivel ta mucho mas halto cu esun di Aruba. Esey sinembargo no a keda desplega diasabra anochi. Pero finalmente toch Aruba ta cay venci y tin cu bay Barbados pa hunga contra St Lucia dia 11 di juni proximo.