Corte di Casacion: Castigo di prizon pa ex parlamentario di St Maarten ta keda vigente!

AMSTERDAM - Korte Supremo di Hulanda na Den Haag a rechasá e kasashon di eks parlamentario di St. Maarten Frans Richardson i komersiante O’Neil Arrindell pa nan envolvimentu den aktonan koruptivo na e kompania ku ta manehá haf di St. Maarten. Ku esaki e sentensianan ku Richardson i Arrindell a risibí den korte di apelashon na St. Maarten a bira definitivo.

Korte di apelashon a sentensiá e eks parlamentario na 20 luna di prizòn pa soborno i abusu di su posishon komo parlamentario. Arrindell ku tabata traha komo “consultant” pa e kompania di haf a haña un kastigu di 40 luna di prizòn.

Di e forma aki e investigashon “Emerald” ku a inisiá na 2016 a yega na su fin. E investigashon tabata dirigí riba aktonan froudulento na e kompania di haf. Den e kaso aki eks CEO di St. Maarten Harbour Group of Companies (SMHGC), Mark Mingo a haña un kondena di 46 luna di prizòn pa falsifikashon di dokumento den korte di promé instansia.

Pero den apelashon korte dia 21 yüni 2022 a apsolvé Mingo di tur akusashon i el a sali liber for di e kaso. Richardson i Arrindell no a presentá den Korte di Apelashon pa tende desishon di hues den nan kaso.

Korte di Apelashon a konfirmá nan sentensia di Korte den Promé Instansia. A haña Arrindell kulpabel di aktonan froudulento entre yüli 2012 i yüni 2014 ku a monta un total di mas òf ménos 3 mion dòler.

Korte a haña probá ku Arrindell a falsifiká dokumentonan relashoná ku “gastunan di mobilisashon” i “kondishonnan general” ku a kobra SMHGC pa trabounan ku e kompania di draga Devcon mester a hasi. Tambe a haña probá ku Arrindell a paga Richardson un suma di 370 mil dòler na soborno.

Ministerio Públiko a akusá Arrindell di a kometé e aktonan di froude kontra SMHGC pa e enrikesé su mes. Na promé instante a akusá Arrindell di a kometé froude na rason di 5 mion dòler, pero korte no a haña tur e akusashonnan kontra su persona pa e suma total di 5 mion dòler probá.

Arrindell den su defensa a bisa ku ta trata di sèn ku el a traha i ku tur e pagonan tabata legítimo. Ministerio Públiko sinembargo a bisa ta trata di gastunan no real ku Arrindell a kobra e SMHGC. Pues ta trata di froude kometé ku fakturanan falsu i segun Ministerio Públiko e úniko trabou ku Arrindell a hasi ta di paga suma di soborno na Richardson pa asina e por a haña su fakturanan pagá.

Korte Supremo den su evaluashon di e kasashon a repasá e motivashonnan ku abogado defensor, Niels van der Laan a trese dilanti, esta ku resibunan falsu i pago di e resibunan aki no ta sufisiente pa proba ku tin aktonan koruptivo kometé. Resultado di e evaluashon aki ta ku e motivashonnan trese dilanti no ta motibu pa destruí e veredikto di Korte di Apelashon. NOTA: E texto ta scirbi den Papiamento fonetico di Corsou.