Cu tres gol di Rangelo Janga, Corsou ta gana Barbados 4-1

WILLEMSTAD - Selekshon di Kòrsou ayera a inisiá nan partisipashon den e klasifikashon pa Mundial 2026. Esaki ora nan a topa ku selekshon di Barbados den Stadion Ergilio Hato.

Selekshon di Kòrsou a kuminsá ataká for di kuminsamentu di e wega. Esaki ora ku na di dos minüt Godfried Roemeratoe a lòs un tiru for di basta leu, pero e bolante di selekshon a faya esaki.

Despues di esaki oportunidatnan no tabata presentá mesun tantu pa selekshon di Kòrsou. Tabatin tirunan di Juninho Bacuna i Joshua Brenet, pero esakinan no tabata di muchu peliger.

E promé gol a bini na di 25 minüt ora ku Brenet a kombiná ku Kenji Gorré, pa despues Gorré duna un pase na Rangelo Janga ku ta pusha e bala aden pa e promé gol.

Lokual a sobra di promé mitar tabata kargá ku pasenan malu, i pèrdèmentu di bala di parti selekshon di Kòrsou. Barbados na algun okashon tabatin oportunidat di gol, pero no a konkretisá esakinan.

Den di dos mitar selekshon di Kòrsou a subi ku dos modifikashon den e aliniashon. Kevin Felida a drenta na lugá di Brandley Kuwas miéntras Jearl Margaritha a drenta pa Xander Severina.

E wega sigui ku pasenan malu pa selekshon di Kòrsou, pero esaki poko poko a drecha. Miéntras na di 60 minüt ku Jearl Margaritha ta kòp, bon, pero e bala a dal den pal’i gol.

Un ratu despues na di 62 minüt,  Rangelo Janga ta bolbe anotá pa hasi e wega 2-0.

Na di 76 minüt Juninho Bacuna ta tira un bon tiru liber, pero ku lamentablemente tambe ta dal den pal’i gol.

Joshua Brenet por poko a debutá ku gol ora ku na di 77 minüt e ta kòp riba un akshon ku bala pará, pero esaki ta bai na banda.

Na di 79 minüt Rayvien Rosario ta drenta pa Juninho Bacuna miéntras Cuco Martina a subi pa Sherel Floranus.

Na di 84 minüt un defensa di Barbados a kontrolá bala ku man den área penal, i esaki a bira un pinalti. Rangelo Janga mesora a kue e bala, i a bai tira pinalti kual el a hinka tambe. Asina wega a bira 3-0  i Janga a kompletá su “hattrick”.

Na di 90 minüt Barbados a hasi e wega 3-1 via un pinalti.

Selekshon di Kòrsou a ser’é bunita ora ku den tempu adishonal,  Gervane Kastaneer riba un bunita pase di Rayvien Rosario ta anotá e di kuater gol pa e ekipo di kas.

Selekshon di Kòrsou djasabra awor na Aruba, lo topa ku selekshon di Aruba den nan di dos wega di klasifikashon pa Mundial. NOTA: Texto ta scirbi den Papiamento fonetico di Corsou.