DIMAS a sigura cu nan ta dunando tur cooperacion na Ministerio Publico pa cu e caso di fraude cu permiso

ORANJESTAD - Diamars 4 di juni 2024, autoridadnan competente a haci un entrada hudicial, supervisa pa fiscal di Ministerio Publico, na entre otro oficina di Departamento di Integracion, Maneho y Admision di Stranhero DIMAS, relaciona cu un investigacion andando. 

DIMAS a informa mientrastanto diaranson cu e ta cooperando cu e investigacion totalmente y ta comprometi pa mantene e normanan di integridad y transparencia den su departamento na halto.

“DIMAS a y lo tuma tur paso cu ta considera apropia y necesario. 

Nos enfoke primario ta pa sigui cu nos mision pa brinda servicio confiabel y di calidad, conforme nos leynan y maneho di admision, na nos comunidad” DIMAS a sigui bisa den su comunicado. Ademas nan a splica cu na e momentonan aki no por divulga mas informacion pa no perhudica e investigacion andando.