Censo 2023: Poblacion di Corsou a crece cu mas di 5 mil hende

WILLEMSTAD - Ofisialmente i di akuerdo ku datonan optené den Senso 2023, poblashon di Kòrsou ta konsistí di 155.826 persona. Esei EXTRA por a komprondé for di informashonnan suministrá pa gerensia di CBS ayera den un konferensia di prensa. T’asina ku di 2 di sèptèmber pa 20 di òktober 2023, Ofisina Sentral di Statistik (CBS) a realisá un Senso na Kòrsou. A alargá e periodo ofisial di e Senso te fin di febrüari 2024. Unabes ku e periodo ei tabata tras di lomba, CBS a kuminsá traha intensivamente pa prosesá e datonan di Senso. Riba CBS su wèpsait di Senso, https://senso.cbs.cw/ por haña un dokumento mas amplio ku e promé resultadonan di Senso 2023 i por download esaki grátis. Aki ta sigui algun di e resultadonan importante di Senso 2023:

POBLASHON

Segun Senso 2023, Kòrsou tin 155.826 habitante: 70.162 hende hòmber i 85.596 hende muhé. Sekso di 68 persona no ta konosí. Kompará ku e Senso di 2011, por mira un oumento di 5.263 persona. Di 2011 pa 2023, poblashon a krese ku 3,5 porshento. Pa loke ta trata e proporshon di hende hòmber i hende muhé, segun e resultadonan di Senso 2023, na Kòrsou tin 82 habitante hende hòmber pa kada 100 hende muhé. Diesdos aña pasá, na 2011, tabata 84,3 hende hòmber pa kada 100 hende muhé. E kantidat di hende hòmber na komparashon ku hende muhé ta bahando; òf, por bisa tambe: kada bes tin mas tantu hende muhé na komparashon ku e kantidat di hende hòmber.

DISTRIBUSHON DI EDAT

Poblashon di Kòrsou ta embehesiendo. Na 2023, 24,7 porshento di poblashon ta kai den e kategoria di 65 aña òf mas. Na 2011, e grupo ei tabata apénas 13,8 porshento. Na mes momento, e porsentahe di mucha (0-14 aña) tambe ta birando ménos: di 19,5 porshento na 2011 pa 14,1 porshento na 2023.

Lugá di nasementu i nashonalidat

Na 2023, 75.4% di poblashon ta nasé na Kòrsou. Na 2011, e grupo ei a forma 75.8%, persona nasé na Hulanda ta forma 5.8% na 2023, persona nasé na Repúblika Dominikana 3.6% i persona nasé na Colombia 3.7%. Por mira un oumento konsiderabel den e personanan nasé na Venezuela, ku awor ta 2.7%.NOTA: Texto ta scirbi na papiamento fonetico di Corsou.