Gobierno di Corsou lo paga debe y edifisio di hospital CMC mester bira di Corsou

ORANJESTAD - Gobierno lo paga debe y edifisio di hospital CMC mester bira di Corsou. Ta trata di un reakshon basta largu i nos lo trata na relatá esaki mas konsiso posibel.  Pa loke ta CMC minister Silvania ta splika ku su gabinete a diskutí e direkshon ku mester tuma pa solushonnan ku e direktor general di e instituto. I mester bisa ku tantu den Konseho di minister komo den e direktiva di CMC tin ku tuma lugá e deliberashonnan nesesario tokante e direkshon di solushon. E puntonan prinsipal di e direkshon di e solushon pa CMC ta entre otro;

Pais ta keda karga ku e gastunan di kapital di e fiansanan tuma pa konstrukshon di e edifisio nobo di hospital. Aktualmente e ta mas òf ménos 18 mion florin pa aña (9 mion pa interes i 9 mion pa pagonan (aflossingen). E suma aki ya ta inkluí den presupuesto di pais i no tin niun ingreso di interes i pagonan (aflossingen) for di CMC pa pais presupuestá. E punto desisivo ta ku e edifisio di e hospital mester pasa pa pais. Pais mes lo karga e gastunan di kapital di e fiansanan su mes. Ademas, pais lo hasi akuerdo separá ku  e konsorsio tokante e “aflossingen” di e fiansa di e konsorsio. Temporalmente e pagonan di interes di e fiansa di konsorsio lo sigui pasa via SVB.

Otro punto ku minister Silvania ta informá Cft ta ku komo pais Kòrsou ta bira doño di e edifisio di hospital, e aktivo finansiero fiho (kuenta pa kobra di CMC) lo keda klasifiká komo aktivo material fiho, pues lo no ta nesesario mas pa tene un provishon riba e kuenta pa kobra di CMC. Ta spera ku formalisashon di e transferensia di propiedat lo tuma lugá no mas lat ku durante di e di kuater kuartal di 2024 i ku e registro di e edifisio di hospital komo aktivo material fiho na pais lo tuma lugá pa 1 di yanüari 2025.

E gastunan di “afschrijving” , mantenshon (grandi) i e invershonnan nesesario pa remplaso pa loke ta e edifisio di hospital lo keda finansiá dor di SVB. Aktualmente esaki ya ta e kaso pasobra SVB ta paga e gastunan direktamente na CMC Exploitatie komo  kompensashon pa e gastunan di hür di CMC Exploitatie ku CMC Vastgoed ta kobra. Konsekuentemente e gastunan aki no tin niun impakto negativo riba e presupuesto di pais, pasobra nan ta wòrdu finansiá pa SVB di mes manera ku ta sosodé awor aki.

Den nos edishon próksimo nos lo drenta den mas detaye di e reakshon di minister Silvania entre otro kaminda e ta toka tambe Ennia, bisando ku  Kòrsou ta di akuerdo pa un evaluashon periódiko riba e reserva anual di 1,5 mion i ta konfirmá di reportá esaki den un rapòrt di ehekushon. Tambe no tin niun opheshon pa duna kopia di e “hoofdlijnenakkoord”, despues ku atendé ku partidonan envolví. NOTA: Texto ta scirbi den Papiamento fonetico di Corsou.