Fox Weather: Aruba ta un di e 6 islanan den Caribe recomenda como refugio den tempo di horcan!

ORANJESTAD – Aruba ta un di e 6 islanan recomenda pa e canal Mericano Fox Weather, cu ta converti den un refugio contra horcan. Esaki den cuadro cu e temporada di horcan 2024 a inicia diasabra ultimo y ta cuminsa pensa unda por bay cu ta ‘safe’ den e temporada aki. ‘Segun expertonan’, e articulo ta bisa, sin bisa cua experto, ‘ esnan cu ta buscando un lugar durante e zomer aki, por opta pa biaha pa e lugarnan aki, tin un probabilidad abou, di confronta tormenta y horcan’.  A identifica 6 isla cu durante e ultimo 170 aña tabata un area cu no a sufri di e problema di clima aki. Tambe ta relata riba e conocido faha di horcan, unda cu ta bisa cu si bo ta cay pafo di e faha, esaki ta bon. 

CUA TA E ISLANAN

E islanan cu ta wordo identifica como ‘safe’ ta Aruba, Bonaire, Corsou, San Andrés(Colombia) y Trinidad y Tobago.

HISTORIA

Segun Fox Weather, ta sigura cu por lo menos 8 horcan a pasa den un radius di 160 km desde 1851, pero cu den ningun di e oportunidadnan aki, a toca tera. ‘E ultimo biaha cu un tormenta di e tipo aki a causa impacto riba e islanan aki, tabata mas di 130 aña pasa”. 

PAFO DI E FAHA

Tin e discusion eterno cu si Aruba ta pafo di e faha di horcan of no, y te hasta ta wordo mercadia como tal. Sinembargo, tin un discusion cu esaki no necesariamente ta berdad y cu e por ta un propaganda ‘falso’, cu por bira un un chiste costoso, si e islanan aki keda afecta, hasta por lo minimo.