Flip Flop Festival a resona diasabra na Harbour Arena

ORANJESTAD – E cambio di sitio pa e concierto originalmente destina pa beach, Flip Flop Festival no a resulta un problema, si mira e publico grandi cu a asisti diasabra anochi pa e evento cu despues di varios aña, a bolbe. For di 5’or cu e portanan a habri cu presentacion di e DJ-nan den e Caribang Tent, e publico cu a crece henter anochi, e artistanan un tras di otro, a sa di deleita e publico cu nan ritmo unico. Artistanan grandi manera Ziggy Recado, Angel Dior, Mical Teja, y esun grandi final, Kes the Band, a sa di presenta uno tras di otro. Y e comentario general tabata cu aunke cu Kes a presenta bastante laat, despues di 1’or di marduga, ‘e tabata bale la pena e orario’. E publico tabata crece henter anochi y dado momento tabatin un fila largo pafo di persona cu tabata wardando pa drenta. Den careda di 10’or por bisa cu e lugar tabata practicamente yen, sigur e parti di VIP Standing, y tambe grandemente patras. Un cos tabata sigur, cu e cambio di sitio na ultimo ora, no a afecta e evento.