Segun documento di corte, AWSS ainda no tin fondo suficiente pa inverti den RWZI

ORANJESTAD – E compania cu a keda encarga cu e operacion di e planta di purificacion RWZI,- esta Aruba Wastewater Sustainable Solutions NV (AWSS) awor cu Parlamento a pasa e ley -, no tin suficiente placa ainda pa inverti den un RWZI nobo. Esey ta contrario na loke cu e minister encarga cu medio ambiente Ursell Arends a bisa diahuebs durante tratamento di e ley den Parlamento. E mandatario a sigura diahuebs conforme un documento cu e la pone ‘ter inzage’ cu entrante 1 di juli e compania AWSS ta bay inverti den e planta, y despues di cuater siman por cuminsa haci e trabounan di purificacion. Pero documento di corte ta bisa lo contrario.

TRATAMENTO DI E CASO

Durante tratamento di e caso na April, conforme e sentencia di dia 8 di mei ultimo, a trata e responsabilidad di AWSS pa cu e palnta. Riba pagina 9 di e sentencia, na punto 4.9, ta bisa cu ‘durante e tratamento di e caso, a resulta cu AWSS, -unabez cu nan tuma e exploitacion di RWZI over- no tin suficiente placa pa inverti den un RWZI nobo’. Ademas e ta sigui bisa cu ‘ Esey lo dura un par di aña mas (prome cu nan tin suficiente fondo:Red). E texto di e sentencia ta sigui bisa “Esey kier men cu AWSS, por lo menos den cuminsamento, lo mester trata cu e mesun planta defisiente cu e tabata prome cu a tume over”. “AWSS lo meser tuma medida awor tambe pa reduci e molester cu RWZI ta ocasiona, mas tanto cu ta posibel”. 

DECLARACION DI MINISTER 

Sinembargo diahuebs durante contestacion di pregunta, e mandatario encarga cu medio ambiente, Ursell Arends, a bisa otro cos. Por lo menos asina e ta zona diferente. Aki e minister a bisa textualmente”Den e documento cu nos a haci ter inzage, ta papia claramente cu cuater siman, ‘from the installation’. Dus aworakinan ta cuminsa e proceso akinan, pero 1 juli e compania AWSS por ta legalmente estableci. Ta bay haci inversionan e ora eynan, y ta dura, ta bay dura algun siman prome cu nan ta instala.  Y unabez cu nan ta instala, despues di instalacion eynan, 4 siman por garantisa cu e holor lo reduci cu 80%”, e mandatario a bisa. Esey tabata su splicacion pakico e la usa e fecha di 1 di November 2024 cu por spera e cambio na e planta. Pero, esaki ta diferente, cu loke a keda bisa den Corte riba e compania ey, manera cu Noticiacla tin den su poder, esta e vonnis cu ta haci mencion cu AWSS no tin placa awor pa haci inversion. Por scucha e audio di e minister referente e declaracion tambe, AKI.