Premier ta delibera cu abogadonan riba demanda contra Parlamentario Gerlien Croes

ORANJESTAD – Awe den curso di dia prome minister Wever Croes ta reuni cu su abogadonan riba e keho y demanda contra parlamentario Gerlien Croes. Asina e la confirma pa Noticiacla. E ta un contesta riba e pregunta di Noticiacla cu si despues di tende e declaracion di Parlamentario Gerlien Croes, cu hopi a considera como un ‘disculpa’ riba su declaracion anterior contra e prome mandatario, e ta continua cu su decision di haci denuncia y demande pa un rectificacion. 

DELIBERA CU ABOGADO

Mas sigur, por a interpreta e contesta como un reunion pa delibera si enberdad ta necesario ainda pa haci denuncia despues cu e parlamentario en cuestion a ‘disculpa su mes’. Declaracionan haci pa e parlamentario Croes, cu e prome mandatario a cataloga como sumamente baho den su direccion. “Ta manera un pos di riool a rementa y tur e sushedad cu tabata sali di su boca tabata di un nivel hopi bochornoso”, premier Wever a bisa durante e reunion pa trata e ley di privatisacion di e planta di RWZI diahuebs. 

E DECLARACIONAN 

Durante e tratamento di e ley, parlamentario Gerlien Croes a haci algun expression den direccion di e prome mandatario, unda cu segun Wever, Croes ta ‘insinua cu e ley di RWZI a bini pa enrikece su mes (mr. Evelyn Croes y famia)’. “Tur esey ta puro mentira, e ta falso. E ta algo cu por sali solamente di un persona cu tin envidia” Wever Croes a bisa den Parlamento e ora como prome reaccion. 

SPLICACION

Despues e prome mandatario a sigui pa splica e situacion na e compania na cual Croes a haci referencia, esta Arulex Trust. “Mi tata ta un homber di 82 aña y ta un homber respeta den comunidad pa tur loke el a haci pa Aruba y den su carera. Ya e tin dos aña cu e no tin ningun laso ni cu Arulex Trust ni cu Croes, Wever & Ruiz.”

DUNA KEHO

E mandatario a sigura e ora cu e lo bay Ministerio Publico pa keha Gerlien Croes pa difamacion y cuminsa un caso di rectificacion. “Bo no por gaña di e forma ey, lastra hende y kere cu tur cos ta keda normal. Y a bis’e pafo di parlamento. Para duro den bo sapato ruman, pasobra mi ta bin pa bo.” Wever a bisa. 

DISPENSA OF NO

Despues di tende e declaracion di prome minister Wever, Croes a reacciona bisando “ Mi a ricibi conseho for di e ultimo persona cu mi lo ricibi conseho den  bida. Pero el a conseha mi y el a bisa mi cu mi tin di bay pidi dispensa pasobra mi a difama su nomber, pasobra e no ta aparece den e registro ni den e lista di accionistanan di ningun compania cu nos a menciona awe mainta. Y mi ta referiendo na Minister President. Nos lo tin cu bis’e ora dispensa cu e no ta doño, cu e no tin ningun beneficio y su nomber no ta aparece ningun caminda. Pueblo lo husga si nan ta kere of no, si su nomber ta bin un caminda of no, of si e no ta hereda nada despues na final.” Esaki a wordo interpreta pa algun como un dispensa y ‘rectificacion’.

KICO PA HACI AWO

Riba esaki Noticiacla a acerca premier Wever Croes pa sa si e ta bay haci denuncia ainda despues di e declaracion di parlamentario Croes of si e ta considera e declaracion di e parlamentario como un dispensa berdad y cu esey ta nifica cu no ta necesario mas pa haci e denuncia y tampoco e demanda pa rectificacion. Riba esaki, e prome mandatario a contesta: “Mi ta reuni cu mi abogadonan mas laat awe”.