Corte: A prohibi JOB Holding pa construi riba Isla di Oro

ORANJESTAD – Corte diaranson ultimo pa medio di un sentencia di 17 pagina, a prohibi e compania JOB Holding & Management VBA, -tanten cu e caso di profundidad no dicta otro-, pa sin permiso di construcccion otorga pa e minister responsabel, haci trabou riba y rondo di Isla di Oro. Esaki den cualkier forma cu ta, incluyendo trabou di limpiesa. Y pa cada violacion di e sentencia aki, ta haya un multa di 250 mil florin pa dia, te na un maximo di 10 miyon florin.

PROHIBI PA PROLONGA DERECHO DI ERFPACHT

Ademas Corte a dicta tambe cu e ta prohibi gobierno di Aruba di ,- tanten no dicta diferente den un caso di profundida -, prolonga e derecho di erfpacht riba percela di Isla di Oro cu e mesun destinacion cu ta den conflict cu proteccion di naturalesa y e reglanan di esaki, ora cu esaki vence dia 14 di februari 2026. Y pa cada dia cu gobierno di Aruba no cumpli cu esaki, ta haya un multa di 250 mil florin pa dia te na un maximo di 10 miyon florin. 

E CASO

E caso inicial a tuma lugar dia 5 di April ultimo ora cu dado momento na final di e caso, partido di banda di gobierno, a protesta contra e huez tratando e caso, citando parcialidad pa cu e otro partido. Pero 10 dia despues, dia 15 di April 2024 corte a rechasa e peticion pa kita e huez di e caso (wraking). Esey kier men cu e huez mes por a sigui cu e caso. A dura un rato, pero finalmente e caso a continua dia 29 di April 2024. E caso ta trata den liñanan grandi, cu FPNA a protesta cu e compania JOB Holding a inicia trabounan riba Isla di Oro, causando daño na e naturalesa eynan. E compania tabata usando machi di coba, esta un excavator. Mesora FPNA a pidi corte un orden temporal pa para e trabounan ey pendiente un caso cu nan lo a cuminsa. Esey nan (FPNA) a haya tambe. Mester bisa cu a keda determina cu JOB no tabata den posecion di un permiso di construccion e momento ey. Nan (JOB:red) ta sigura Corte cu nan tabatin un permiso di construccion, pero no a logra produci esaki, ni ora cu a suspende e caso tres siman ora cu tabatin e asunto di duda den e parcialidad di e huez pa e caso. E intento di JOB pa declara FPNA no admissible den nan demanda, a keda rechasa pa Corte tambe. Ademas e asina yama ROPV, cu ta e ordenanza di teritorio ta prohibi pa tin construccion riba e tereno menciona.  Y como tal, tanten cu e ROPV no cambia, ta prohibi pa cualkier instancia (tambe JOB) pa construi algo riba e tereno, renoba of traha di nobo. Corte tambe a determina cu e derecho di erfpacht cu JOB a logra haya, cu su destinacion, no ta pas y ta contra ley pa loke ta e uso di e isla. Por lesa e sentencia completo AKI.