Camera den bus ta revela ultimo ratonan prome cu accidente fatal

ORANJESTAD – E video camera den e bus di Arubus cu tabata envolvi den e accidente di dialuna anochi, ta revela e ultimo minuutnan prome cu e accidente. Danki na e video aki, ministerio publico por a mira kico a sosode e ultimo ratonan prome cu e accidente fatal a sosode, y por trece claridad riba otro asuntonan.

VIDEO DI E BUS

E fiscal encarga cu e investigacion, a mira e imagennan di video di e camera cu Arubus tin instala den e busnan. Y loke por a mira riba e imagennan, sigur ta hopi conmovedor, segun NoticiaCla.com a compronde. Riba e imagennan e.o. por wak cu e chauffeur ta coriendo e bus, y haciendo su trabao na un manera totalmente concentra y trankil. For di e video por mira tambe cu e chauffeur a sigui haci su trabao cu concentration y trankilidad te na e ultimo parada.

ULTIMO PARADA

Ta despues di e ultimo parada, e video ta mustra con e chauffeur a bira malo. Riba e video por mira con diripiente e chauffeur ta hay ‘e cu un problema fisico. Asina cu esey sosode, por mira con e bus ta boks y despues con e bus ta para. Loke ta hala mas atencion ainda, ta con e pasaheronan ta bula pa purba yuda e chauffeur. Pues ta resultado cu e pasaheronan ta purba algo heroico pa purba yuda e chauffeur, den loke a resulta di ta e ultimo momentonan di su bida.

AUTOPSIA

Mientras cu un patologo ta programa pa conduci un autopsia diaranson merdia riba e curpa di e chauffeur di Arubus cu a fayece dialuna anochi, e investigacion riba bus mes tambe ta continua. NoticiaCla.com a haya confirmacion cu e investigacion riba e bus ta na encargo di e specialistanan di trafico di Cuerpo di polis, KPA, den cooperation cu mecaniconan di Arubus (debi na nan conocimento di e busnan cu Arubus ta core cu nan).