Pa proteha neishi di shoco, Flip Flop Festival a muda pa Harbour Arena

ORANJESTAD – E conocido Flip Flop Festival ta muda su sitio di evento di Bushiri Beach, pa Harbour Arena. Esaki pa evita destruccion di neishi di Shoco cu a wordo haya na e sitio original na Bushiri Beach, ora cu a haci e setup inicial di e scenarionan pa e evento grandi siman pasa. Diaranson merdia, e organisadornan a informa cu a dicidi pa tuma e decision dificil y costoso, pa muda e sitio, pa asina no risca haci daño na naturalesa, mas sigur, e neishinan di shoco. Esaki despues cu pa 80% e escenarionan tabata construi. Algo cu normalmente ta dura 10 dia di trabou. Aworaki lo tin cu haci tur e trabou aki den apenas 2 dia, cu ta hopi mas costoso, pero lo hacie si. E festival mes, ta canando bon, y manera cu Noticiacla a raporta caba, tur cos ta canando pa e festival tuma lugar. 

UNICO BEACH

E organisadornan a splica cu siman pasa ora cu a bay construi e scenario riba -por cierto e unico unda cu por tene evento publico y deportivo- Bushiri Beach, a bin topa cu un neishi di shoco, cu a crea poco consternacion den comunidad, primordialmente organisacionan di medio ambiente y proteccion di bestia, incluso shoco cu ta un especie proteha pa Aruba. E organisadornan a tuma nota di e conmocion cu a bin riba rednan social y e comentarionan di publico, y a opta pa tuma e decision mas responsabel pa muda e evento e ora completamente pa un otro sitio, cu no ta beach, pero cerca di beach si, cu ta Harbour Arena, esta riba tereno di haf. 

TROPICAL BOTTLING COMPANY

Representante di Tropical Bottling Company cu ta e patrocinador principal di e evento, cu su producto Chill y Balashi di Brouwerij Balashi, Rowald Werleman a splica cu e companianan cu e ta representa, semper a traha pa cu sostenibilidad di nos isla. A mustra cu p.e. Chill y Balashi ta e unico cu tin un programa di reciclahe y cu 90% di e botternan ta bin bek nan planta pa wordo recicla. E intencion di e celebracion ta pa consumidornan di Chill, ta despues di un sondeo pa tin un beach festival, pa cual inicialmente a scohe Bushiri Beach. Desde cu a haya e neishi, y cu a comunica cu Aruba Conservation Foundation, tabata miho solucion pa e neishi y muda e evento. Werleman a sigura cu tin mas di un siman trahando riba e situacion. E fundacion di medio ambiente a bisa cu lo mester di por lo menos 3 siman pa por cambia e sitio di habitad, pero e no a logra. Werleman a sigura cu aunke e ta un punto costoso, y poco fastioso, nan ta sigura cu nan lo ‘make it happen’ si, pa diasabra awor tin e evento grandi aki. Artistanan ta cuminsa yega for di awe caba pa ta presente na e evento grandi diasabra awor. 

TYSON LOPEZ

Pa e fundacion Tyson Lopez, for di 2017 ta trahando pa conserva e shoco na Aruba. Mas y mas tin neishi unda cu no ta normal, pasobra e lugarnan normal ta wordo destrui. E problema por ta e zonido, luz pero e canamento riba beach cu por destrui e neishi di e shoco.