MPR: Lo dura un tempo mas prome cu resolve problema di baymento di coriente na Aruba

ORANJESTAD – ‘Bo no ta bay gusta loke mi ta bay bisabo”, tabata e contesta di representante di e compania Mericano MPR, Brian Curran diaranson mainta na Noticiacla. E pregunta tabata, pa ki tempo e situacion di coriente, despues di nan investigacion haci, ta bay mehora na Aruba. Curran a contesta cu no tin fecha, y lo dura un poco mas di inconveniencia, prome cu cos drecha na Aruba. Esaki pasobra lo dura un poco prome cu e trabounan di mantencion ta dje leu ey cu por ‘evita’ interupcion di coriente. Rapidamente durante e conferencia, tabata hopi cla cu e problema tabata ‘mantencion’, of falta di esaki durante hopi aña.

PROBLEMA CU PRESENTACION

E presentacion mes a experencia problemanan diaranson mainta unda cu no por a haya e ekipo pa ilustra e presentacion, pa e traha. Despues di un tardansa, a logra esaki, pero despues di un tempo, tabatin un otro problema, ora cu fuse a bula. Pues hasta durante e presentacion, tabatin problema cu tabata un ironia cu ni aki por tabatin algo sin problema. Unabez esey tabata resolvi, parcialmente, pasobra a dicidi di usa un pantaya mas chikito di computer, e presentacion a continua. 

INVESTIGACIONDespues cuater di e representantenan di e compania MPR a duna nan relato basta technico, di nan investigacion di un siman y mei na Aruba di e situacion di WEB. Hopi rapido, tabata conoci cu e problema tabata mantencion. A mustra cu cifras, con e diferencia ta di e situacion normal y awor, y por a pone den contexto di con serio e situacion ta aworaki. 

MANTENCION

E compania a splica cu e problema ta falta di mantencion y parti di e structura di e compania unda cu mester cambia esaki pa por tin miho control y operacion pa por evita problema cu coriente. E positivo ta cu nan tin confiansa cu implementacion di nan recomendacionan, lo remedia e situacion cu tin aworaki, pa hopi aña. E problema sinembargo, ta cu e lo bay dura poco tempo prome cu e ta asina leu. 

FALTA DI EKIPO

Un di e problemanan ta cu tin un problema pa haya material y ekipo necesario pa reemplasa esnan cu tin aworaki, y cu e problema durante Covid, esta e supply chain (e cadena di suministro) ta pega y cu tin masha hopi demanda internacional riba e tipo di material y ekipo, y no tin suficiente material pa por suministra y na tempo. Un di e problemanan ta pa por haya e.o. trafohuis, cu ta hopi necesario pa Elmar, no tin aworaki. Y tambe tin hopi ekipo otro cu no por haya aworaki. Placa tin, y tin te hasta personal, pero no tin material suficiente. Y esey no ta bay soluciona por lo pronto. Como tal e problema di coriente por sigui pa un tempo mas. Mientras cu personal ta ok aworaki, conforme e plan di MPR, mester di mas personal, y personal dedica pa por maneha cierto aspecto, y aki ta unda cu tin problema tambe. 

PLAN PA EHECUTA

E compania a presenta un plan hopi ambicioso, di 3 aña cu mester wordo ehecuta integralmente. Un programa cu ta inclui restructuracion parcial di e structura organisatorio di e personal, unda cu p.e. mester busca personal dedica pa cierto aspecto di control, cu aworaki no tin. A nota cu tambe tabatin varios funcion y parti cu no tabata funciona optimal of corecto, y cu mester conoce cambio. Y como consecuencia, mester haci un restructuracion parcial di e compania, pone cierto hende corecto na e lugar corecto, y sigura cu ta sigui e plan aki pa e situacion por mehora. 

TIN PLACA

Ora cu a puntra e gerente di ELMAR y director di UTILITIES, compania madre di ELMAR, Anthony Yrausquin y Anthony Rojer respectivamente, ambos a sigura cu nan tin e placa y si no tin, nan lo haye di gobierno pa por sigura cu no tin problema cu coriente mas. Riba pregunta di Noticiacla, cuanto placa esaki lo bay costa, Yrausquin a bisa cu no por duna un cifra exacto, pero pa haya un idea, anualmente ta gasta 40 miyon florin na mantencion, pues mester sea redobla esaki, si no ta mas. Tambe a sigura cu ya a cuminsa busca mas personal, pero no ta haya tur hende ainda y tin un escases di cierto talento. Pues esey ta keda un reto. E punto ta cu placa tin, pero ekipo y hende falta. Y ta trahando duro pa remedia esaki. 

CORIENTE LO SIGUI BAY

Na final, ora cu a sigui insisti pa un contesta na ehecutivonan di MPR, pa wak cuanto tempo lo dura pa remedia e situacion y pueblo no tin cu sufri mas cu perdida di coriente, nan a bisa cu lamento, cu no por bisa cuanto tempo lo dura, pero cu lo dura un poco mas, prome cu e situacion drecha. Dus, cu otro palabra, mientras cu e problema ta detecta y cu tin un plan pa remedia e problema, por lo pronto, mester sigui soporta e problema di coriente na Aruba.