Hermans: Durante temporada di horcan, tres sistema tropical por afecta Aruba mas sigur

ORANJESTAD – Durante e  temporada di horcan pa 2024, por lo menos 3 tormenta cu nomber por afecta Aruba, segun Rino Hermans, director di Crisis Management Office (CMO). No ta specifica si, si ta trata di tormenta of horcan, pero si cu e ta un ciclon cu nomber. Durante un conferencia di prensa diaranson pa anuncia plannan di e departamento pa e temporada, Hermans a splica Noticiacla cu, conforme e pronosticonan, tur cos ta mustra cu por lo menos tres di e tormentanan pronostica, ta pasa hopi cerca di Aruba, mas specifico, como 80 km panort di Aruba. Esaki ta traduci den hopi awacero mes, cu por causa inundacion na cierto partinan di e isla. 

AWA TA E PROBLEMA

Segun Hermans, ora cu tin tormenta cu nomber, sea ta tormenta, of horcan, e problema pa Aruba hopi biaha ta e awa y no asina tanto e biento. Y fuera di e tres tormentanan, tin mas tormenta of situacionan di tempo cu ta bay afecta nos isla den e periodo. Y ta depende con satura nos isla ta caba cu awa, cu esaki por afecta nos ora cu e tres sistemanan menciona, acerca of pasa cerca di nos.  Esey ta pasobra si e tera ta satura caba pa yobidanan anterior, cualkier otro sistema ta bira un problema serio pa Aruba. 

KI TEMPO

Segun Hermans, e tres tormentanan aki, conforme e pronosticonan actual, por wordo spera na fin di juli y comienso di augustus di e aña aki. Hermans a sigui splica cu pa nos parti di region, e prome lunanan ta esunan cu mas tin efecto pa nos ya cu e sistemanan e ora ta pasa mas cerca di nos. Despues di augustus, e sistemanan tin chens y posiblidad di move mas ariba, aunke semper ta keda e posibilidad cu esaki por cambia.