Hospital di Corsou CMC tin placa pa opera un of dos siman mas so

WILLEMSTAD - E situashon finansiero di Curacao Medical Center (CMC) ta sumamente agudo i pa e motibu aki djabièrnè siman pasá a inisiá ku un huisio sumario kontra gobièrnu. E pèrdida akumulá di CMC a yega alrededor di 205 mion florin.

Si no bini ku un solushon pa e situashon finansiero den 1 pa 2 siman e operashon di CMC ta pega direktor finansiero di CMC, Karina Lombardi a bisa durante un konferensia di prensa ayera. El a splika ku CMC tabatin un fasilidat di krédito di 18 mion florin, pero no tin espasio mas den e fasilidat aki.

“CMC a yega ‘rock bottom’ i tin espasio di 1 pa 2 siman so mas.” Si no presentá ku un solushon tin ku para kuido elektivo i duna kuido esensial so paso no tin likides mas pa paga tur gastu nesesario.”

Direktor general Gilbert Martina a duna splikashon riba e huisio sumario ku a entamá siman pasá pa pidi pa gobièrnu paga 14 mion florin na debe di gastunan di transishon di St. Elisabeth Hospitaal pa e hòspital nobo. Ta trata di 40 mion florin total na gastu konforme un desishon anterior di korte.

Gobièrnu a paga 19 mion kaba i falta alrededor di 20 pa 21 mion florin mas. CMC entretantu a entregá pa 14 mion na fakturanan habrí ainda den kuadro di e gastunan di transishon i ta hasi un apelashon riba gobièrnu pa paga esakinan.

Tambe ta pidi den e huisio sumario pa gobièrnu paga 10,7 mion florin na kuido di personanan ku no ta legal na Kòrsou. Martina ta bisa ku gobièrnu den pasado a paga 19,7 mion di gastu di kuido pa personanan no dokumentá ku a kubri e periodo ku te ku 1 yanüari 2023, pero di 1 yanüari 2023 te ku awor e gastunan a akumulá atrobe i yega 10,7 mion florin.

E di tres petishon ta pa gobièrnu den 1 siman di tempu entregá e rapòrtnan final di e kompania KPMG. Ta trata di rapòrt riba investigashonnan ku KPMG a hasi riba 7 diferente aria na CMC konforme un akuerdo den liña grandi (“hoofdlijnenakkoord”) ku CMC a firma ku gobièrnu.

Martina ta bisa ku mayoria di e investigashonnan ta kla pero te ainda gobièrnu no a entregá e rapòrtnan final na CMC. “E rapòrtnan aki ta hopi nesesario mirando e situashon finansiero agudo ku CMC ta aden”, Martina a bisa.

Finalmente ta pidi gobièrnu pa den 3 siman presentá ku un planifikashon realístiko di implementashon di tur e puntonan di akshon ku ofisina di konsultent KPMP a presentá kuné pa yega na un solushon struktural di e retonan ku CMC ta aden i sanashon di e debe akumulá ku a yega 205 mion florin.

Martina ta bisa ku un dia tur hende mester di kuido hospitalario i ta pidi gobièrnu pa solushoná e reto finansiero di CMC. “Mi ta pidi gobièrnu, promé minister i minister di salubridat, Javier Silvania ku ta alabes minister di Finansa pa laga duna realse i solushoná reto finansiero di CMC.” NOTA: Texto ta scirbi den Papiamento fonetico di Corsou.