Corte di Casacion a aplasa sentencia matrimonio mesun sexo cu 6 siman

DEN HAAG – Corte di Casacion, osea Hoge Raad, a hala e sentencia riba e caso di matrimonio mesun sexo cu 6 siman, te dia 12 di juli proximo. E motibo pa a aplasa e fecha, no ta conoci, pero ta confirma riba e portal di Corte di Casacion. “E sentencia di Hoge Raad, por lo pronto ta determina pa tuma lugar riba 12 di juli 2024” ta poni riba e portal. Inicialmente e fecha pa e sentencia tabata poni pa dia 31 di mei proximo, esta diabierna awor. Esey kier men cu mester warda 6 siman mas prome cu e sentencia ta conoci. No ta conoci si e cambio ta debi cu na Aruba Parlamento su tratamento di e ley ta poni pa mitar di juni awor. 

TRATAMENTO PARLAMENTO

Pues e caso ta bira mas interesante, si tene cuenta pues cu Parlamento a pone e fecha nobo pa tratamento di e ley di matrimonio di mesun sexo, te 18 di juni proximo. Anteriormente no tabata mira e sentido pa trata e ley despues cu ya Hoge Raad a dicta su sentencia, pasobra e sentencia ta surpasa e ley anterior cu Parlamento pasa. Pero awor, ora cu Parlamento trata e ley, ainda no tin un sentencia conoci.