Koki herida den e pelea entre yiunan di politiconan, ainda no por ricibi su placa

ORANJESTAD – E koki A.H. cu a keda herida durante e pelea den un restaurant cu a envolvi yiunan di politiconan local na 2022 incluyendo yiu di prome minister Wever-Crpes, ainda no por keda cla pa haya su indemnisacion. Durante e pelea aki, un di e sospechosonan esta Torres Mendez a causa e lesion na e braza di e koki durante e pelea, door di tira cu glas cu a alcansa e koki su brasa. Door di e acto aki, e castigo di Torres Mendez durante e caso tabata mas halto. E caso mes a keda trata na comienso di 2023, y pa April 2023, e la keda sentencia pa su participacion. 

E HERIDA

E koki H. mester a haya 22 hechting, of punto, pa su herida na su braza. A consecuencia di e herida y e daño causa pa esaki, e koki mester a keda cas hopi dia pa recuperacion cu a afecta su situacion financiero tambe, ya cu e no por a traha. Durante e tratamento di e caso, abogado a pidi 13 mil florin di daño pa e koki, pero na e sentencia na April di 2023, huez a otorga (solamente) 3.500 florin cu mester a paga na e koki como daño y perhuicio. 

CAMINDA DI CRUZ

Un aña despues, ainda e famia di e koki no por a keda cla pa haya e placa otorga segun sentencia. Segun e famianan, na juni di e mesun aña, Ministerio Publico a informa cu nan tin e OK pa paga e suma di placa. Pero te awor, un aña despues, nada ainda. “Foi aña pasa, mi ta yama tur siman, y tur siman nan ta bisami cu ta un carta mester firma door di e hefe pa mande (departamento di ) Finanzas. Anto ainda mi mester cana caminda di cruz ora pasa Finanzas” e casa di  H. a bisa Noticiacla.