Van Huffelen a toca tema di matrimonio mesun sexo cu comunidad LGBTQ+ di Aruba

ORANJESTAD – Manera cu Noticiacla siman pasa a raporta, e bishita e siman aki di secretario di estado Alexandra van Huffelen na Aruba tabatin riba agenda, pa topa cu miembronan di comunidad LGBTQ+, y esaki a sosode tambe dialuna. Tabata dialuna merdia cu durante un almuerso e mandatario a topa cu un grupo di e comunidad aki. 

DISCUSION

Durante e almuerzo, e la discuti e progreso, reto y e pasonan dilanti di e tema di matrimonio di mesun sexo. Un di esnan presente, tabata actual lider di partido ACCION21, Miguel Mansur cu ta un persona homosexual abiertamente. “Tabata un honor pa mi atende esaki. Tabata un oportunidad pa grandi’e pa su defensa interminable na nomber di e islanan, su hendenan y su pasenshi generoso” Mansur a bisa riba su pagina di Facebook. Segun Mansur, lo sinti su falta grandemente y su reemplasante tin sapato grandi pa yena.

CASACION

Notable ta e momento pa topa cu e grupo aki di persona, si tene na cuenta cu pa fin di siman aki, Corte di Casacion lo mester a dicta su sentencia riba e ley di matrimonio di mesun sexo. A compronde cu e sentencia aki awor hala te 12 di jiuli proximo. Ta premira, conforme e conseho di e Abogado General Hulandes, cu e veredicto lo ta cu Aruba y Corsou tin cu habri e ley di matromonio pa pareha di mesun sexo mesora. Esaki ta surpasa cualkier ley cu Parlamento di Aruba dicidi ariba ora cu e (bolbe) vota mitar di juni riba e ley aki. Prome minister Wever a bisa Noticiacla cu unabez cu Corte di Casacion presenta su veredicto, esaki lo ta e final riba e tema y lo tin cu atene na e veredicto aki tambe. NOTA: Potret cortesia Miguel Mansur.