Kock: Tera News a relata e realidad, pues no tin nada pa rectifica!

ORANJESTAD – Corte mester rechasa e demanda di minister Endy Croes contra Tera News, pa rectificacion pasobra clientenan tin prueba di loke nan a declara contra e minister. Specificamente, e rapport cu e compania Ernst & Young a traha riba e caso di Fundacion Lotto pa Deporte,(FLPD) mes ta bisa esaki den e rapport. Asina abogado di Tera News, David Kock a argumenta den corte dialuna mainta. E caso ta pa su clientenan rectifica e declaracion cu e minister lo a enrikese su mes y famianan cu placa di e fundacion. 

CITADONAN

E abogado a cuminsa na cita varios parti di e rapport investigativo di E&Y. , den cual ta establece e relacion di e minister cu e tempo ey tabata director di Lotto, y tabatin relacion comercial cu varios negoshi cu su ruman den e caso aki E. Croes. Entre nan, cu Lotto lo a paga por lo menos 5 miyon florin na negoshinan di e ruman homber, durante e periodo cu a investiga. Ademas conforme e rapport, ta stipula cu e awor minister, tabata te hasta accionista den varios di e negoshinan di su ruman. “Algo increibel”. A base di e citadonan, segun Kock, ta claro y confirma cu por papia di enrikisimento di famia. 

MALVERSACION

Ademas Kock ta usa e sentencia di corte di prome instancia cu e awor minister Croes tabata culpable di malversacion. Y cu contra di e sentencia aki, a pidi pa revoca e sentencia, pero cual peticion a keda revoca. Y despues tambe, cu hasta den casacion, esaki a keda rechasa. 

NADA PA RECTIFICACu tur e puntonan presenta, e abogado ta sigura cu su clientenan a actua den liña cu e realidad. Y como tal tambe ‘no tin nada pa rectifica’. A toca e tema tambe di libertad di expression y cu e acusacion di e awor minister, ta limita e base legal di e expression ey. Segun Kock, libertad di expression no ta solamente nifica e contenido di e expression, sino tambe e forma den cual esaki ta wordo eherce y tambe e declaracionan cu por ta problematico y impactante. A toca tambe e parti di lomba hancho di un minister y cu den esaki tambe mester por absorba asuntonan mucho mas leu cu e caminda ‘normal’. Y como tal un persona den posicion di minister, sa cu e ta den un posicion bou di un ‘vergrootglas’, y mester por acepta mas tambe cu otro. 

CONCLUSIONE conclusion cu Kock ta yega na dje ta cu basa riba e puntonan menciona, e loke cu su clientenan a trece dilanti, ta completamente basa riba realidad y tambe hechos, y conforme e hurisprudencia di Corte, no por papia di un acto ilicito y cu tambe e ora no tin un base legal pa rectificacion y pesey a puntra tambe pa rechasa e peticion di e minister den e caso aki. Huez a cera e tratamento y ta dicta sentencia dia 12 di juni proximo durante e rol di mainta.