Suarez: Tera News mester rectifica declaracion dañino contra minister Endy Croes!

ORANJESTAD – Tera News, compania madre di e portal 24ora.com y e programa radial Enfoke, mester rectifica declaracionan dañino contra minister di deporte y enseñansa Endy Croes. Esey tabata e base di e defensa di abogadonan Suarez y Ruiz dialuna mainta den Corte den e caso cu nan a entama contra Tera News.

DECLARACION DAÑINO

E declaracionan cual e abogadonan ta referi na dje, ta e.o. cu, Croes lo a enrikese su mes y famia cu placa di Fundacion Lotto pa Deporte, y cu Hof a confirma e aresto di Hof di 22 juli 2011, unda cu Hof lo a duna FLPD razon den e retiro otorga na Croes cu e tempo ey tabata director di e fundacion. Ambos ponencia segun e defensa pa e minister, no ta cuadra. Ademas, e defensa ta argumenta, e publicacionan aki no ta para riba nan mes, sino ta relaciona cu e programa Enfoke 90. 

CONVICTO

Segun e defensa di e minister, e dos presentadornan Patrick Paskel y Nelson Andrade den e programa a referi na minister Croes usando e palabra ‘convicto’ basando nan mes riba e detencion di e cliente na 2010 debi na supuesto iregularidadnan rond di FLPD ora cu Croes tabata director ainda. E palabra convicto, segun defensa di e minister, ta haci como cu e minister a keda sentencia den un forma penal, cu no ta e caso. Segun e defensa, e acusacionan haci ta hopi dañiño y no solamente pa su bida personal sino tambe como su trabou como minister. “E declaracionan no ta berdad y ta falta base legal. Esaki pasobra segun defensa, no tabatin sentencia den corte di apelacion ni casacion, unda cu ta determina cu Croes a enrikese su mes y su famia cu placa di FLPD. 

ERNST & YOUNG

E proceso legal entre Croes y e oficina di contabilidad Ernst & Young y FLPD, ta relata na e caso cu FLPD a inicia contra Croes, pa desolve e relacion di trabou. Den e caso di prome instancia, aki e huez a bay di acuerdo cu FLPD y e rapport y a disolve e contracto sin otorga daño y perhuicio. Sinembargo den apelacion, hueznan e biaha aki a determina cu no a aplica e practica di replica, y tambe cu e rapport tabatin yen di inconsistencia y iregularidad, cu por conduci na un bista mas negativo di Croes, mientras cu e hechonan no ta hustifica esaki. Y e abogadonan. a argumenta cu no ta pasobra e ta para den rapport, esaki ta nifica cu e contenido ta cuadra cu realidad. Asina mes, e abogado di Tera News, ta pretende cu e informacion ey ta corecto y ta usa esey como nan fuente. Algo cu segun e defensa di e minister, no por, pasobra e contenido pues, no ta cuadra, manera cu corte despues mes a mustra. Den casacion tambe, defensa ta sigui argumenta, hueznan a mustra cu den apelacion, huez a usa e cuadro di evalacion corecto pa determina e iregularidadnan di E&Y. Esey a pone cu den casacion E&Y a perde su caso tambe, defensa ta sigui argumenta. Y nan ta sigui bisa cu esaki a keda raporta tambe pa e mesun medio cu ta raporta esaki como berdad, contra ken aworaki tin e caso. A argumenta tambe cu Tera News/ Headlines Group ta usando e rapport di E&Y como nan base, siendo cu e informacion di e rapport a wordo desbarata tambe den corte, pues no por usa e argumentonan di e rapport aki como base pa nan acusacion. Huez ta dicta sentencia riba dia 12 di juni 2024 y lo pone pues riba e rol di e dia ey.