Conocido ciudadano Franky Kuiperi a bay sosega

ORANJESTAD – Awe mainta a drenta e tristo noticia di fayecimento di conocido ciudadano Franklin “Franky” Kuiperi. Franky, manera su amigonan tabata yame, tabata na Colombia pa su salud, pero awe marduga a fayece den su soño na e hotel unda cu e tabata keda. E tabata malo y a bay Colombia pa su salud. E tabata falta pa keda algun dia mas pa controle, pero Dios a dicidi di tume den su reino. Asina cu e noticia a plama, por a nota un inundacion di mensahe riba e.o. facebook di tur skina di mundo.

TRAYECTORIA

Franky tabata hopi conoci pa hopi aña como director di Arubus, pero porta mas ainda pa su amor pa deporte y su trabounan social cu Lions Club of Aruba. E forma con e tabata comenta actividadnan deportivo tabata diferente. E tabatin su estilo di narado deportivo y tambe su programanan tanto televisa como radial di deporte. Un persona cu tabata sumamente stima entre su amigonan y mas ainda, e mundo deportivo. Den e parti social tambe Franky tabata hopi activo, specialmente ora di actividadnan cu Lions tabata organisa. Franky a fayece na edad di 63 aña. Cu Dios tume den su reino, y cu famia Kuiperi haya e forza den e momentonan dificil aki. Condolencia di parti di NoticiaCla.com.