Gerente di Amsterdam Manor ta bati alarma (atrobe) riba situacion alarmante di RWZI

Gerente di Amsterdam Manor ta bati alarma (atrobe) riba situacion alarmante di RWZI

Posted on 05/27/2024 10:24 am AST | Updated on 05/27/2024 11:17 am AST

ORANJESTAD – Den un carta habri dirigi na prome minister Evelyn Wever-Croes y otro stakeholders, e gerente doño di Amsterdam Manor Beach Resort Jürgen van Schaijk a ‘bati alarma’ y pidi atencion pa e concepto di ley pa e traspaso di e trabou di net di riool, y e instalacion di kimamento, y e medida di emergencia pa evita un disaster pa cu e instalacion di Riool Water Zuiverings Instalatie (RZWI) na Bubali. 

E SITUACION

Den e carta, Van Schaijk ta menciona e hecho cu e Aruba su economia ta florece, pero no tabatin bista riba e bentaha y desbentaha di esaki. Un di e desbentahanan segun e director, tabata e RWZI na Bubali. E crecemento debi na e economia creciente, no a conduci na expansion di e respectivo planta, y no tabatin e interes pa destina fondo publico pa haci esaki. Van Schaijk ta referi tambe na e decenas di casonan cu e la entama contra varios gobierno, cual casonan e la gana tur, y asina mes gobiernonan a neglisha esaki. “Ta evidente cu por papia di mal maneho cu consecuencia dramatico pa salud publico, naturalesa y medio ambiente” e ta bisa. E hecho cu awor kier privatisa e planta, ta algo bon, pero segun e director, no ta kita su preocupacion. Esaki pasobra e privatisacion no ta un solucion total, basando su mes riba conseho di Raad van Advies. Segun e director, ainda ta sacando awa ‘sushi’, via Bubaliplas den laman banda di hotelnan, entre Eagle Beach y Palm Beach. Ni cu rapportnan di manera CARMABI, esaki a wordo atendi. “Gobierno mester tin berguensa”, van Schaijk ta sigui bisa. Pa logra un solucion duradero, e director ta menciona 4 punto den su carta largo, cu ta envolvi entre otro, un pakete di medida di emergencia, te ora cu traha un RWZI nobo, traha un RWZI nobo cu capacidad di minimal 15 mil kuub, na un otro sitio, pone fondo disponible pa regla tur esaki, y establece normanan pa loke ta impuesto riba holo. Por lesa e carta completo AKI.  

  • Postobon
  • Powered by SETAR