Motociclista a bira e di 6 morto di trafico pa 2024

ORANJESTAD - Diabierna merdia pa 1:30 central di polis ta wordo notifica di un accidente entre un auto y un brommer riba e caminda di Calabas.

Central a despacha patruya na e sitio di e sucedido.  Na yegado di patruya ta bin topa cu e chauffeur di e brommer MFA- 2491 ariba caminda gravemente herida. Ta pidi ambulance na e sitio cu urgencia. 

Na yegada di ambulance e personal a haci nan maximo esfeurso pa yuda e victima pero, lamentablemente no por a haci nada mas pa e victima.

Pa 2:10 dr.Texier ta constata morto di Jefferson Manuel R.  Lopes naci 05-11-1995 na Aruba. Lopes tabata un conocido futbolista pa e seleccion di RCA y Caiquetio. 

E chauffeur di Toyota BYD color blanco numera A-59462  a wordo transporta pa  hospital pa haya asistencia medico y a keda deteni pa maneha bao di influencia. 

Specialista di trafico a presenta na e sitio como tambe polis technico pa haci nan investigacion. 

Departamento di slachtofferhulp a presenta pa sostene e famia den e momento dificil aki.  Noticiacla ta manda palabra di condolencia pa famia di e fayecido.