Chauffeur di Arubus ta fayece den accidente na cruzada Alhambra

ORANJESTAD – Mas probable a consecuencia di un atake di curason, un chauffeur di Arubus tabata envolvi den un accidente awe nochi, cu a resulta fatal p’e. tabata dialuna anochi, cu polis, ambulance y materialenwagen di brandweer a wordo manda cu urgencia na e crusada Alhambra Casino pa un accident cu un bus di Arubus. E chauffeur di e bus lo a perde control y a subi e barancanan na e crusada di Alhambra Casino. A raporta tambe cu tabatin varios persona herida.

BUS RIBA BARANCA

Na yegada nan ta bin topa enberdad cu un bus di Arubus pega riba algun baranca. Tabata tin mas o menos 20 pasahero den e bus, di cual varios tabata levemente herida. Ambulance a trata nan na e sitio, y tabata visto cu e chauffeur di e bus tabata esun mas grave, y tabata pega den e bus. Mesora e personal di brandweer a cuminsa cu e trabounan necesario pa libera e chauffeur. Pero na mes momento a bin ripara cu e chauffeur no tabata duna señal mas di bida. Lamentablemente cu no obstante tur esfuerso, cu pa 11:40pm, Dr. Thuis cu a presenta na e sitio, a constata morto di Jeffrey Irvin Duinkerk, naci na Aruba dia 1 di april 1970 y tabata biba na Siouxstraat # 16. Fiscal mr. Zondervaan a tuma e curpa den beslag pa mas investigacion.

KICO A SOSODE

Na e sitio nan a bin compronde cu e bus tabata biniendo di panort, y cu e chauffeur probablemente lo a bira malo na stuur, cu consecuencia cu e el a perde control, subi algun baranca cu tin na e crusada di Alhambra, y laga e bus keda pega riba e barancanan. Informacion ricibi na e sitio ta bisa cu e chauffeur ta di fam Duinkerk. Departamento tecnico di polis tambe a bay na e sitio pa haci investigacion. Slachtofferhulp tambe a wordo pidi na e sitio mirando cu tin familiares di e defunto cu a yega na e sitio. E crusada di Alhambra lo keda pa oranan largo cera pa asina brandweer y polis por haci nan trabounan necesario. NoticiaCla.com ta manda palabra di pesame na famianan di e fayecido. 

CANTIDAD DI ACCIDENTE PA 2015

Cu esaki nos ta conta caba e di 7 caso di morto den trafico riba nos isla, di cual 3 tabata riba motorcycle. A registra e prome accidente fatal e aña aki dia 1 di februari na altura di Kazerne di Brandweer na Sabana Berde, den cual un motociclista hoben di apenas 17 aña di edad a fayece. E di dos caso di accidente fatal a tuma luga dia 13 di maart na Spaans Lagoen, ora un auto a alcansa un hobencita di apenas 12 aña di edad. A raporta e di tres caso dia 28 di maart riba e caminda di Shete bayendo Conchi, unda un turista naci na Filipina a fayece. E di cuater caso a keda registra dia 6 di april, den cual un motociclista a perde su bida na altura di Any Time Restaurant na Paradera. E di cinco accidente fatal a sosode dia 26 di april ultimo na altura di Wintergarden, unda un motociclista di apenas 19 aña di edad a fayece. E di seis accidente fatal a sosode dia 6 di mei den oranan di marduga net pariba di rotonde Las Americas, ora un auto a dal den un borchi grandi di trafico y e chauffeur di 28 aña di edad a fayece na e sitio mes. Y cu e caso di awe nochi, ta yega un cantidad di shete morto den trafico pa aña 2015.