Varios parti di Aruba a keda afecta atrobe pa interupcion di coriente marduga

ORANJESTAD – Baymento di coriente ta sigui ta un problema serio na Aruba. Y ni cu presencia di e compania Mericano MPR cu ta haciendo e investigacion riba netamente e problema aki, coriente ta sigui bay diariamente. Diaranson anochi, cos a bolbe cuminsa den un parti di e areanan di Babijn, Paradera, Bloemond, Cristal, Koeriboeri, Marawiel, Roncado, Rooi Prikichi. Esaki ora cu un maststation di Koeriboeri a pega candela y kima full. Esaki a pone cu Elmar mester a interumpi coriente pa eherce un trabou di reparacion urgente riba e maststation di Koeriboeri. “For di e momento cu interumpi e suministro, ta premira un duracion di mas o menos 2 ora pa realisa e trabou di reparacion” tabata e mensahe. 

PROBLEMA CU WEB

Despues marduga a sigui e problemanan, unda cu e biaha aki tabata WEB su ‘falta’. ELMAR a anuncia banda di 4’or cu debi na un interupcion den produccion di coriente den planta di WEB, ELMAR tabata confrontando un problema den e distribucion di coriente den e areanan aki. E prome areanan raporta cu esaki tabataun parti di Santa Cruz, un parti di Savaneta. Despues a informa pa 4;19am cu einterupcion den produccion di coriente den planta di WEB ta afectando dos Onderstation di ELMAR awor. E areanan afecta ta Paradera, un parti di Noord, un parti di Oranjestad. Un minuut despues a anuncia cu nan ta riba stand-by pa e produccion di coriente wordo reestableci den e planta di WEB pa asina por reestablece e suministro di coriente. Mas of menos 20 minuut despues a anuncia cu a logra reestablece e suministro di coriente den e segundo Onderstation afecta door di e interupcion den produccion di coriente. E area di Balashi Zuid y Savaneta Zuid tin servicio di coriente bek, y pa cuarto pa 5, tur area afecta tabatin coriente bek. 

MAS PROBLEMA A SIGUI

Despues ora cu a kere cu cos lo tabata ok bek, a resulta cu tabatin mas problema den careda di 5’or di marduga. Pa 5’or y mei a raporta cu a detecta e problema. A resulta cu e causa di e interupcion tabata debi na un ‘gevallen draad’ na Seroe Pita. E team di Lineman a mobilisa pa e sitio pa eherce e trabou di reparacion. Alabes, e hoogspanningslijn Seroe Pita a wordo isola. Tabata te mas of menos algo prome cu 7’or di mainta cu coriente a keda re-estableci atrobe. Asina henter un anochi e ekiponan di ELMAR mester a traha pa por a drecha un sin fin di problema di coriente.  

RED SOCIAL

Habitantenan afecta no tabata nada contento obviamente cu e situacion y a vocifera esaki riba e pagina di ELMAR. TAbatin hende cu tabata rabia pasobra nan no por a drumi siendo cu tabatin examen, tentamen y un sin fin di cos cu tabata pendiente. Y colmo de los colmos, awacero cu a cay, no a yuda e situacion.