Hodgson: Proyecto renobacion hospital canando na tempo

ORANJESTAD – E proyecto renobacion hospital ta canando na tempo Despues di precisamente un aña cu a cuminsa cu trabaonan na e proyecto di construccion y di edificionan nobo y renobacion di e edificio actual di Dr. Horacio E. Oduber Hospitaal, a opta pa tene un reunion cu e financiadonan pa haci un presentacion di con leu trabounan ta andando. E reunion tabata parti entre splicacion, entrega di documentonan y un “tour” na e facilidad, pa por a mira progreso den e trabounan andando.

CANANDO NA TEMPO

John Hodgson , Presidente di Stichting Onroerend Goed Aruba (SOGA) a expresa di ta hopi contento con e proyecto ta desaroyando, specialmente e forma profesional cu ta trahando. SOGA ta satisfecho cu te awor e proyecto ta canando na tempo y den e presupuesto aloca. Ta custumbra cu den proyectonan grandi asina, ora cuminsa mesora “extra werk” ta bin, pero cu e contratista aki, te awor no tin nada di esey. “Pasobra nan ta hende hopi profesional, bo por conta loke nan ta haci y nan ta haci na un manera cu ta na nos smaak. Y nos ta hopi contento”, segun John Hodgson , Presidente di SOGA. “Mi ta sigur cu e publico di Aruba ta bay ta hopi contento cu loke e ta bay mira. Pa Aruba e ta bay ta un tremendo proyecto”. E reunion mas bien tabata pa mustra progreso di henter e proyecto na e banconan y duna nan e nivel di confianza necesario cu e proyecto ta moviendo bon y na tempo.

FASE

Reunionnan regular asina ta pa e financiadonan por compronde unda e compania ta cu construccion y tambe pa nan tin “input” den decisionnan cu tin di haci cu e proyecto. Pa loke ta construccion di e prome fase, e toren nobo pa pashent mester ta cla pa habri na october 2016, e “Medical Office Building” mester ta cla pa februari 2016 y e “Central Energy Plant” mester ta cla pa juli 2016. E ora e trabounan di renobacion di e edificio existente ta cuminsa, cu lo dura dos aña y mester ta cla pa juli 2018.