DCA: Fumigacion den cabina di avion no ta un rekisito legal

ORANJESTAD - Na algun paisnan e ta un practica pa fumiga den cabina di avion net prome cu yegada di un vuelo. E practica aki, yama desinsectacion di avion, ta wordo haci pa evita importacion di vectornan y malesanan transmiti pa vectornan. 

Durante ultimo añanan a bin ta ripara cu e practica aki ta wordo aplica durante vuelonan pa Aruba, specialmente door di aerolineanan di Latino-America. Tin aerolinea ta menciona cu esaki ta wordo haci door cu e ta un rekisito di autoridadnan di Aruba. A base di iniciativa propio, y tambe a base di peticion di algun di e aerolineanan aki, Departamento di Aviacion Civil a tuma riba su mes pa trece claridad den esaki. A tuma contacto cu e autoridad concerni, cu ta Directie Volksgezondheid (DVG), door cu esaki ta un tema di salud publico. 

Despues di a tuma nan tempo pa haci un bon analisis y evaluacion, DVG a confirma entre otro e siguiente puntonan:

•          Desinsectacion di cabina di avion na e momento aki no ta un rekisito legal pa vuelonan pa Aruba y na e momento aki DVG ta haya cu no ta hustificabel pa haci esaki un rekisito tampoco.

•          Banda di desinsectacion den cabina di avion, tin otro maneranan mas efectivo pa preveni importacion di vectornan y malesanan transmiti pa vectornan. 

•          Sinembargo, den caso cu aerolineanan kier aplica desinsectacion den cabina di avion como parti di nan maneho di compania, segun guia di World Health Organization (WHO), DVG no ta descurasha esaki.

•          DVG a laga sa di lo keda monitorea y lo avisa den caso si mester bin cu medida pa evita importacion di vectornan y malesanan transmiti pa vectornan. 

Departamento di Aviacion Civil a informa esaki mes ora verbalmente na e aerolineanan concerni, y dia 21 di mei 2024 a haci esaki por escrito na e aerolineanan. 

Di awor en adelante, e aerolineanan cu ta scoge e practica di desinsectacion den cabina di avion durante vuelo pa Aruba lo ta haciendo esey a base di maneho di e compania y no paso e ta un rekisito legal di Aruba. 

Cu esaki Departamento di Aviacion Civil ta duna contenido di su rol como facilitado den Aruba su industria di aviacion, segun Anexo 9 di ICAO (“Facilitation”).

Departamento di Aviacion Civil ta gradici nan coleganan di Directie Volksgezondheid pa nan cooperacion pa trece claridad den e asunto aki. Pa mas informacion por tuma contacto cu Departamento di Aviacion Civil na dca@dca.gov.aw.