Fiscal na Groeneveldt:” Bo no a wak nada cu tin un cacho cu ta putriendo?”

ORANJESTAD – Fuera di e rekisitorio di e fiscal diaranson den e caso di maltrado di bestia contra e acusado A. Groeneveldt, e fiscal a haci un serie di pregunta na Groeneveldt, pa ‘compronde’ con e situacion por a yega na unda e la yega. Y tabata preguntanan simple. Cuanto tempo e tin cacho, kico e ta haci su cu cachonan, con su bida ta ora cu e yega cas di trabou.  Riba cada un, Groeneveldt tabata duna su contesta. Dado momento pasenshi di e fiscal a cuminsa caba. “Bo ta conta mi kico bo ta haci cu e cachonan, y bo no ta wak nada cu tin un cacho cu ta putriendo. E cacho aki ta un proceso di luna. Con bin bo no a wak e cacho asina? Bo ta wak net den e cacho!” fiscal a bisa. Despues e la cuminsa cu e rekisitorio.

REKISITORIO

Segun fiscal, e potretnan cu tin riba e incidente aki, ta hopi cla. “Potretnan no ta gaña. E cacho a sufri hopi tempo. E contestanan cu mi no a wak, esey no ta yuda” e fiscal a cuminsa na bisa. Djey e la manda un mensahe pa tur hende cu tin cacho. “ Cacho ta responsabilidad. Ta bo responsabilidad cu e cacho ta keda den bo cura, cuminda y dak. Ta bo responsabilidad pa controla e cacho., bo no por bisami cu un cacho na estado, bo no ta wak cu e ta muriendo,. Un herida habri, holor putri. Bo mester a wak esaki. No tabatin halsband, sino un cadena rond di e garganta. E parti di e liña. No por cu bo cacho ta semper pa tempo largo na un liña., sigur no den e caso aki. Ta bo trabou, no di otro. Abo a scohe pa esey. Bo no por bisa cu bo a cuida e cacho aki bon. E veterinario tabata hopi cla cu esaki. Hopi carpata, anemia. Bo mester percura pa esaki. Esey ta un mascota” e fiscal a bisa, den direccion di e acusado. Segun e fiscal, e acusado a haci tur esaki intencionalmente.” E tabatin mester sa miho. Mas hende a manda señal. E la viola e ley, door dino duna suficiente cuido. Pa loke ta e mal reputacion cu Groeneveldt a haya y e menasa y e trato, fiscal kier men cu ta su mesun falta. “MI no por haci nada pa e mal propaganda. Esey ta pasa ora cu bo maltrata cacho” e fiscal a finalisa bisando. Despues e la pidi e castigo conoci di trabou comunitario y multa monetario.  Ademas, mientras cu castigo maximo pa un acto asina ta 6 luna di prizon, e fiscal a sigura cu den e caso aki, ‘castigo di prizon no ta aplicabel aki nan’.