Huez: Ta proba legalmente cu Groeneveldt a maltrata su cacho

ORANJESTAD – Dos luna despues di e incidente di maltrato di cacho, e doño di e cacho, A. Groeneveldt tabata dilanti mesa berde pa responde pa e acusacion contra dje di maltrato di cacho. Durante dos ora largo e la keda confronta cu e hechosnan, pregunta di huez, rekisitorio di fiscal y e defensa di parti di su abogado. Na final, huez tabatin suficiente informacion pa dicta un sentencia mesora den su contra, cual sentencia e la dicidi di acepta mesora tambe, haciendo esaki irrevocable e ora. 

HUEZ

E prome parti di e caso tabata e session unda cu huez mes a interoga e acusado Groeneveldt, lansando varios pregunta na e acusado. For di e interogacion, huez a saca afo cu Groeneveldt tabatin mas cu un cacho, tabatin un bida y trabou hopi agita, y tabatin mas hende envolvi cu segun ‘palabracion’ mester a yud’e cuida pa tur e bestianan cu e tin. Huez, varios biaha mester a pidi e acusado pa clarificacion di su declaracacion. “Ki tipo di acuerdo bo tabatin cu esnan den e cas?” Y porta e pregunta mas importante “ Siendo cu bo tabatin mas ayudo cu acuerdo, toch bo tabatin un periodo basta largo cu tabatin falta di cuido. Con bo por splica esaki!”. Aki Groeneveldt su contesta repetitivo, tabata ‘Mi no sa. Mi no sa con esaki por a sosode’. Y ‘Mi tin duele y mi ta pidi despensa”. “Mi no por splica exactamente kico a pasa. Ainda mi ta den shock”. Palabranan cu e la keda ripiti durante henter e mainta. “ Mi no ta hayando e puzzel pa saca afo kico a pasa cu mi no tabata presente. Mi ta sinti mi mes hopi horibel. Nos no por splica kico a pasa” Ademas e tabata purba sigura cu loke a pasa ta inusual. “Semper cos tabata bayendo bon. Pero esaki mi no por splica. Mi ta stima bestia. Tur mi bestianan mi ta stima”. Despues huez a atende riba e circumstancia den cual a bin haya e bestia. Aki a bin e discusion riba e cadena y e liña special cu cual e tabata mara e cachonan na final. E la sigura huez cu nunca e kier mara e cachonan na liña, pero door cu e no tin cura, y tabatin keho di bisiña, e la dicidi pa mara e cacho na e liña special. Na Hulandes yama ‘un looplijn’. E problema ta cu mientras cu e ta sigura cu ora cu e cacho(nan) ta mara na e liña ey, ora cu a actua na fin di maart, a haya e cacho en cuestion, mara na un cadena, di cual e cadena tabata rondona rond di garganta di e cacho, causando lessionan asina dramatico cu e la penetra den e cuero, y strobe e sanger di sigui pasa pa resto di e curpa di e cacho. Huez tabata cuestiona su contestanan tambe.”Meneer a bisa polis cu e ultimo dia cu bo tabata pafo, 24 di maart anochi, bo a duna tur cachonan cuminda, e ora ey bo no a wak e cacho na e cadena?”. Segun Groeneveldt, e la sigura huez cu no. “Si mi a wak e cadena ey, mi lo a kit’e”, e la sigura e huez.  Despues e huez a atende su situacion den cual e la haya su mes aden. “Mi ta deduci cu bo a ripara cu bo a cay den un spagaat. Bo tin hopi trabou, a bisabo pa pone hekwerk pero bo no tin e cen y permiso (di e doño di cas), bo tin bisiña riba bo lomba” e huez a cuminsa bisa. “Pakico bo no a scohe pa hiba e cachonan otro caminda of organisacion?”. Segun Groeneveldt, e la haci esey for di januari, y a tuma contacto cu Luna Foundation, pero cu nunca nan a responde cu no tabata por pasobra nan tabatin mucho cacho nan mes. Huez a trata e potretnan dramatico cu e ta considera como ‘basta duro’. Un cos cu a hala atencion di e huez, den e rapport di e veterinario cu a haci autopsia, ta cu e heridanan tabata di termino largo. “Mi ta purba wak kico bo ta declara. Y bo no a wak e cadena ni e cabez hincha?. Con mi tin cu compronde esey.?”, e huez a puntra. Aki Groeneveld a bisa cu dia 24 di maart (e caso a keda descubri dia 26 di maart:red), e la haya un potret di e cacho di un hende cu lo tabata interesa den e cacho y e puppies.  “ Na e potret por a mira cu e cacho no tabata hincha. Mi a wak su bakinan. Pami e no a mustra. Claro cu si mi tabata wak e mi lo a wak e. Pero e potret no ta mustra esey”. Huez lo no a kere y a sigui puntr’e. “Mi ta 100% sigur cu mi no a wak e”. Despues huez a constata cu ‘no tin discusion cu ora cu a wak e situacion cu e tabata cu cadena’.  Na final, huez tabata sigur di algo” Bo por compronde cu tin negligencia di un tempo extendi?”. Despues e la pasa  pa e fiscal su rekisitorio.