Croes: Cliente a wordo incorectamente acusa di maltrato intencional di cacho!

ORANJESTAD – E acusacion principal contra A. Groeneveldt, segun su abogado diaranson mainta, tabata cu e ta wordo acusa di abuso di animal. Pero, e elemento mas importante, ta cu e ta wordo culpa di a haci’e intencionalmente. “Ningun momento e ta desea esaki. A haci algo sin pensa” tabata palabra di abogado Desiree Croes, abogado defensor di Groeneveldt. “ Groeneveldt no a actua of keda sin actua realisando cu esaki lo trece dolor, herida of (ta) malo pa salud. E tabata stima su cacho,. Y e tabata wak pa nan y e puppies” Croes a sigi bisa. 

TEMPO CORTICO

E ta relata tambe riba e tempo cu tur cos a sosode, argumentando cu e tempo den cual e maltrato a sosode, mester tabata den un tempo corte, si analisa e mensahenan. Cuminsando cu e prome mensahe dia 21 di maart ultimo di Crioyo Trappers. A splica cu 5 dia prome cu e dia den e situacion cu a haya e cacho, e tabata bon ainda, pafo. E pregunta ta, con e por a haya e heridanan e ora. 

E JARDINERO

Aki ta prome biaha cu Croes a sugeri kico por a pasa. “ Loke nos ta kere cu a pasa, ta cu e tuinman, e lo a mar’e (e cacho:red)  na un cadena mas pisa. Esey a pasa sea 24 (di maart) anochi of 25 den dia”. Segun e abogado, cu su cliente dia 23 di maart ainda a wak su cacho completamente bon. Fuera di esey, su cliente no tabata desea pa nada pasa. E la actua. E la highlight esaki for di 17 januari di e aña aki. Aki a sugeri cu ta Luna Foundation tambe a faya den esaki, ya cu e fundacion lo a contesta 2 luna despues. Tambe e abogado a referi na un potret di Luna Foundation di dia 24 di maart, unda cu bo ta wak e cacho sinta, bo no ta wak e herida, bo ta wak e puppies, resto di cuminda. Dia 25 di maart, su cliente no a wak e cacho mas. Y esey ta e dia cu cos a bay foi man. “Nos no sa kico a pasa. Hecho ta cu e la haya un cadena mas pisa. E otro cachonan no. Nan tambe tabata mara bou di palo. Kico a pasa cu Blacky, no por wordo contesta pa Groeneveldt, segun Croes. E ta sigura cu su cliente a laga e cacho bon.

CACHO A BIRA NERVIOSO

Un otro posibilidad segun Croesm, ta cu dia 26, e cacho (rasa jackrussel) a bira nervioso. “Hopi cos por a pasa, cu e hacie nervioso, e lo a mira un sapo, e lo a lora su curpa rond di e cadena den un dia” Ademas segun Croes, e cacho no a muri eynan. Tabatin bon speransa cu e cacho por a recupera. Pero practicamente dia 30 di maart Luna Foundation a publica cu e cacho ta un fighter pa un dia despues, dia 31 e ta muri un dia despues, e abogado a finalisa bisando. 

OTRO SPLICACION

Huez a confronta e abogado cu si tabatin duda. “Bo tin un otro splicacion? Bo ta trece e causa na duda. Por substancia esaki?” e huez a puntra. Croes a bisa cu no pasobra e no a haya e documentacion. ” Mi ta ga er van uit kere cu e dierenarts tin rason”. Y ademas, e mama no tabata ‘asina malo’ pasobra e tabata duna lechi y e puppies tabata ok,, argumentando cu si no tabata asina, e puppies tambe lo a mustra malo. 

SITUACION DI CLIENTE 

 E abogado a splica e bida awor di e cloiente. “Groeneveldt, ta haya hopi erg loke a pasa, E no por a drumi, e backlash tabata grandi. E ta haya mensahe di odio. Locual tambe tin, ta cu e la wordo saca for di partido politico. Su trabou di casamento tambe a cancela. E no mag drenta e propiedad di Phoenix, Divi, y Tamarijn. E no mag di ni subi e tereno. Su huisbaas a a dune 3 luna pa sali for di cas! 15 di juni e tin cu bay”. Segun e abogado, 100 mil hende a mira e video di Khaleesi, e nomber nobo cu e cacho a haya. E abogado a remarca cu hasta e canal di television di noticia Hulandes NOS a duna atencion na esaki. SMAC tambe a stop relacion cu ne. Pues e backlash tabata enorme. Y awor e no tin placa pa mantene su mes.

PAKICO GROENEVELD SO

Finalmente e abogado a mustra cu e ta cuestiona cu ta su cliente so ta wordo marca aworaki, siendo cu e tin suficiente ehempel unda cu tin maltrato di cacho. Recientemente, un doño di cacho a mata su cacho. Un choler a hinca un cacho. Y asina tin cantidad di raportahe. Niun ta yega cerca OM. Niun ta wordo marca asina. Ta solamente su cliente ta haye den e situacion asina, siendo cu tin masha hopi caso di maltrato, pero niun no ta haya e atencion aki of ta wordo raporta. Y e ta cuestiona esaki.