Groeneveldt sentencia pa maltrato di cacho cu trabou comunitario y multa

ORANJESTAD – E doño di e cacho maltrata Blacky cu despues a haya nomber Khaleesi, A. Groeneveldt, a keda sentencia diaranson mainta na 60 ora di trabou comunitario di cual 20 ta condicional, y un multa di 750 florin. E sentencia ta irrevocable ya cu mesora Groeneveldt a dicidi cu no ta apela e sentencia. E ta trata e caso cu a haya masha hopi atencion dos luna pasa na maart, ora cu a descubri e cacho, maltrata severamente na garganta y cu despues a bin fayece a consecuencia di e heridanan. A haci denuncia contra e persona, y diaranson mainta e caso a keda presenta dilanti un huez imparcial. Despues di mas of menos 2 ora di tratamento di e caso, huez a reuni internamente un rato y a opta despues pa dicta sentencia mesora, debi cu tin suficiente informacion pa por a tuma decision mesora. 

E SENTENCIA

Huez a splica cu e caso a causa hopi conmocion na Aruba y besindario, y tambe tabatin un impacto fuerte riba e persona culpable. Pa loke ta e reaccion, segun huez, esaki ta mustra cu pueblo ta bisa cu cuido di bestia na Aruba ta algo importante. Pa loke ta e cargonan, huez a mustra cu a keda legalmente proba cu Groeneveldt mas di un biaha intencionalmente y bou full su responsabilidad, y cuido, a causa dolor na e cacho y a perhudica e cacho. E cacho tabata pa un tempo largo mara na cadena y e doño a falta di dune e cuido necesario manera dune cuido medico, awa, cuminda y dak. Ademas a keda proba cu tabatin intencion condicional y cu Groeneveldt a actua asabiendas y voluntariamente door di su negligencia. Tambe ta proba cu Groeneveldt di desde Januari di e aña aki pa 26 di maart ultimo, mas cu un biaha no a cumpli cu su tarea pa cuida pa e cacho. Tur esaki ta hacie cu e la comete un acto penal. “E señor ta castigabel” huez a sigui bisa. A mustra tambe cu e ta considera e castigo pidi pa fiscal, como rasonabel y no ta mira motibo pa desvia di esaki. Como tal e ta mantene e castigo solicita, cu ta 60 ora di trabou comunitario di cual 20 ta condicional, cu un tempo di prueba di 3 aña y un multa di 750 florin. Si no cumpli cu e multa, e tin cu sinta castigo di 15 dia di prizon y si no cumpli cu e castigo di trabou comunitario, e tin cu sinta 30 dia den prizon.