Gobierno coriendo contra holoshi pa leynan pasa

ORANJESTAD – Faltando apenas 5 siman pa parlamento di Aruba baha cu reces (reces ta di 7 di juli pa 17 augustus), tin un cantidad di concepto di ley cu tin cu keda aproba ainda den parlamento. Problema ta sinembargo, cu mayoria di e conceptonan di ley aki ta sea pega un of otro caminda, of simplemente cu no a cuminsa traha ariba nan ainda mes. Y tardansa di esaki por crea problema serio pa gobierno si no cumpli cu algun di nan ehecucion na tempo.

LEYNAN PENDIENTE

Entre nan, tin e concepto di ley pa aumento di BAZV cu 1%. E ley tin cu drenta na vigor 1 di juli proximo, pero ta wak esaki scur. Pero mas importante porta, ta e concepto di ley Financieel Toezicht, esta e creacion di College Aruba Financieel Toezicht (CAFT). Y tin tambe esun cu porta ‘menos urgencia’, pero igual di importancia, cu ta esun di parkeermeter. Esey mester a pasa e siman aki mes segun e director di Arubus Teo Croes. Pero presidente di parlamento Marisol Lopez Tromp a sigura NoticiaCla.com cu esaki lo no sosode. E unico ley programa pa wordo trata, ta uno di fondo di enseñansa diaranson awor. 

DWJZ

For di minister di finanza Angel Bermudez, NoticiaCla.com a compronde awe nochi, cu 'nan ta trahando riba e conceptonan’. No a duna mas informacion, ni bisa cua specificamente  e 'conceptonan' ta. Mas investigacion sinembargo a revela, cu e ley di aumento di BAZV ta pega ainda na DJWZ, cu ta e lugar unda cu e amienda pasa recientemente den parlamento, tin cu wordo traha den un ley. Te ainda, esaki no a keda cla y consecuentemente no a yega parlamento tampoco. E problema ta, cu mester introduci esaki entrante 1 di juli, cu ta apenas 4 siman lew. Algo cu tampoco ta mustra realisabel. 

CAFT

Cu e tardansa di introduccion di CAFT, esta e ley Financieel Toezicht , -cu tin  mas urgencia cu tur mirando debi na su ehecucion di 1 di augustus di e aña aki-, gobierno por haye den un problema serio. Si esaki no keda pasa na tempo, e tin consecuencia pa pais Aruba, ya cu Hulanda por ‘tuma medida’ pa incumplimento di e protocol firma di 2 mei ultimo. Manera ta conoci, e protocol ta dicta cu e ley mester pasa mas tarda 1 di augustus. Falta di cumplimento lo pone cu Hulanda por aplica medidanan contra Aruba, manera un Maatregel van Rijks Bestuur.