• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Kock ta insisti: Acusacionnan contra Benny Sevinger ta inhusto

ORANJESTAD – E acusacionan contra sospechoso principal Benny Sevinger ta inhusto y e mester haya absolucion di e acusacionan. Esaki tabata e base di e defensa dialuna merdia den Corte di Apelacion pa e caso penal Avestruz. Segun David Kock, tur cos ta mustra cu ta un persecusion politico contra su cliente y nada di cual e ta wordo acusa, tin prueba y of base. 

NO A FAVORECE ESNAN LIGA CU AVP

Kock a sigura Hof cu un moneda tin dos banda. Tabata importante pa establece cu Sevinger tabata minister di infrastructura y no comercialisacion. A repasa e tempo cu a confronta e crisis economico mundial y a bin cu plan pa drecha economia di Aruba. Pesey a bin cu erfpacht comercial. Mr. Kock a splica cu Sevinger tabata haya mas di 100 peticion y documentonnan pa dia pa firma. Pesey Sevinger tabata confia den e departamentonan encarga cu dunamento di tereno. Sevinger tabatin “open door policy” y masha hopi hende a acerc’e pa laga e proceso di haya tereno cana. Hulanda, segun Kock su defensa,  ta haci como si fuera cu Sevinger tabata favorece esnan liga cu AVP pero a sigura no ta asina. Na opinion di Kock, segun ley, bo no mester ta na DIP pa duna un peticion pa tereno sino serca Minister. E abogado a bisa Hof cu PG ta cuestiona Sevinger di ta favorece hende siendo cu ley ta bisa cu ta Sevinger mester haci esey.

SEVINGER NO TA CASTIGABEL

E abogado a remarca cu AG ta bisa cu Sevinger no tabata controla e peticionnan y tabata djis firma. Segun Kock, segun ley, ta net Sevinger ta  esun cu mester firma e peticion y despues DIP ta sigui cu e proceso. Pesey, ta inhusto cu ta acusa Sevinger pa algo cu no ta castigabel. Kock a bisa Hof tambe cu durante tratamento di e caso den Promer Instancia, Hues a cualifica Sevinger como un machine di stempel. Den Corte Superior, Hof a puntra Sevinger con e ta haci su trabao. Sevinger, segun Kock, a splica cu esaki tabata pasobra e kier a hiba un maneho pa trece bida den economia.Tabata conoci cu niun hende Sevinger a nenga di firma pe. Ademas, AG no por a demostra ningun caminda cu Sevinger a nenga di firma peticion pa tereno. E 400 peticionnan cu Sevinger a logra demostra, 100 no a haya tereno. Esey ta mustra, contrario na loke PG ta bisa,  cu ta DIP ta screen y no Sevinger.

DESHAUN Y ELENATH

Kock a splica cu den e casonan Deshaun y Elenath, e persona a haci peticion y a haya tereno. Te dia di awe e proyectonan ta hiba e nomber Deshaun y Elenath. Mr. Kock a bisa cu Sevinger no tabata envolvi den nada sino Every cu tabata e man drechi di Sevinger cu tabata haya yamadanan di Arends y hasta a traha documentonan di Arends y hiba pa Sevinger firma. Tabatin un relacion entre Every y Arends cu a trece cun’e cu Arends a haya e terenonan. Hasta durante e tratamento awor, Arends a hasta indica cu tabatin un ‘relacion’ manera platonico. Basa riba tur esaki, e abogado ta haya cu Sevinger mester wordo declara liber. E director di Deshaun tabata e dama Werleman . y Elenath e homber Franken. Ningun caminda tin nomber di Arends. Mr. Kock a remarca tambe pues, cu con Sevinger por tabata sa cu ta Arends ta pidi tereno si su nomber no tabata aparece. E no tabata sa cu nan intension tabata pa bende tereno. Ni DIP a investiga esaki. Como tal, Kock ta haya e acusacion contra Sevinger no funda.

TESTIGO TA GAÑA  

Kock a bisa cu e unico prueba cu AG tin cu lo a paga Sevinger, ta declaracion di e testigo Roga. E abogado a splica cu ta hopi cla cu pa ley  , un testigo so no ta suficiente den e caso aki. Hues den Promer Instancia a rechaza esaki berdad y a declara Sevinger liber di e acusacion cu lo a paga Sevinger. A splica ciu e señora di Sevinger a bisa cu e lo a duna Roga un envelop pa Arends y ta ticket di loterianan di Miami cu a wordo manda pa Arends. Kock a bisa ademas asina cu ta haya cu AG a bruha cos pa laga mustra cu ta Arends a manda placa pa Sevinger, cual no ta asina. Kock pues ta sigura cu Roga ta gaña.

PAKICO NO APELA CONTRA ABATH Y EVERY

Kock den su defensa pa Sevinger, a bisa Hof, cu ta interesante cu  Abath y Every ta wordo declara liber y cu aki AG no a opta pa apela. Con por ta, siendo cu ta Abath ta esun cu ta evalua e peticionnan pa haya tereno y Every a traha concepto pa Arends. E abogado a remarca cu no tabatin grupo selecta manera PG ta pretende. El a bisa cu e Hulandes cu a pidi pa e mesun tereno na Sasaki, Sevinger a firma e peticion y manda DIP.

TIRA CULPA RIBA ABATH DI DIP

Pa loke ta e dossier Damira y Lizner, Kock a bisa Hof cu nan a haci peticion pa haya opcion riba tereno. Pero no tin ningun indicacion cu Sevinger a privilegia nantamb. E la splica cu aki tambe, Sevinger a firma e peticion y manda DIP pa sigui e proceso. Sevinger no por yuda, cu Werleman, Nuñez y Mansur a sera cabez pa bende terenonan pues e no tin parti den esaki. E abogado ta haya cu ta Abath mester a haci control y bin cu e exigencianan pa yega na opcion pa tereno, pero aki tambe AG ta culpa Sevinger. A mustra cu a declara Abath liber pa tur e acusacionnan aki, siendo cu ta Abath ta esun na DIP cu mester regla tur cos. Kock a bisa Hof e ora cu cu no ta algo castigabel cu e terenonan a wordo bendi y ademas cu Sevinger no tabata sa di esaki y pesey Kock ta haya cu mester declara Sevinger liber den esaki mescos cu Hues den Promer Instancia a haci.

A CUMPRA E MINISTER  

Ora cu a trata e parti cu lo a cumpra e minister pa tereno,  Kock a bisa Hof cu paley, si bo a djis tuma algo, esey tin castigo di 3 luna di prison. Pero si a tuma algo y a haci algo contra bo responsabilidad, e ora ey tin castigo di 4 aña di prison. Mr. Kock a mustra cu e contribucion na Fundacion Curazon Berde di Sevinger na 2013 no ta cumpra Sevinger pasobra e tabata pa campaña di eleccion y no cu a haci donacion adelanta pa 2016 ora a haci peticion di tereno erfpacht comercial. Na opinion di mr. Kock, PG ta mustra cu ta Harms ta doño di e companianan, pero esey no tin nada di haci cu e donacion na fundacion. E abogado a menciona decision di Corte na Hulanda caminda ta mustra cu partidonan politico por haya donacionnan y no necesariamente por bisa cu e minister a wordo cumpra. No por ta asina cu na Hulanda e no ta castigabel pero na Aruba si.

SUSSEBEEK

Kock a splica cu  AG ta bisa cu Sussebeek a haya 11 tereno pero esey no ta berdad. Ta 4 tereno so Sussebeek a haya segun Kock. E realidad tabata cu ta suyiunan y su defunto mama a pidi tereno, pero eseynan no ta di Sussebeek. E abogado a bisa Hof cu Sussebeek a yuda su amigo Sevinger cumpra cosnan pasobra Sevinger no sa unda pa cumpra. Sinembargo, segun Kock, no ta straño cu Sevinger ta pidi su amigo di hopi tempo pa cumpra e cosnan y despues Sevinger a paga. Segun Kock, tambe tin situacion cu Sevinger a duna Sussebeek placa pa cumpra cosnan. El a splica cu Sussebeek no tabatin necesidad pa cumpra Sevinger pa haya tereno. Sussebeek tabata haci peticion manera tur otro hende y Sevinger a firma mescos cu tur otro. Por corda e declaracion den corte siman pasa unda cu Sussebeek mes a bisa cu siendo amigo, no mester cumpra otro. Pa loke ta e machine di train di gym, tabata asina cu ta Sevinger a recomenda un machine na Sussebeek y e lugar na Merca a manda un oferta pa Sevinger pero no recibo. Segun Kock, ta Sussebeek a haya e recibo y a resulta cu e machine ta mucho grandi pa Sussebeek su gym.   Kock ta haya cu esaki no ta nifica cu a cumpra Sevinger. Ta un hecho cu a hiba e machine na Sevinger pero no ta asina cu Sussebeek a cumpra e machine pa Sevinger.

Kock a sigui bisa cu 20 December 2015 Pristine Estate di Holiday Inn hotel a haci peticion na Sevinger pa expande e hotel den e prolongacion di erfpacht. Kock a bisa Hof aki cu abogado mr. Sjiem Fat tabata un di e abogadonan cu hopi experencia y AG ta bisa cu el a palabra kico pa papia cu Pristine Estate. Algo cu no ta berdad segun Kock. E la bisa Hof cu Sevinger a firma e aprobacion pero e ta mustra cu mester a bay DIP pa sigui e proceso. Dos aña despues, na 2017, a haci donacion na Fundacion Curazon Berde. El a mustra cu Lowenstein a paga pa evita cu e ta wordo persigui y haya mal umber den e mundo hotelero.

MALUSO DI FUNCION DI MINISTER

Pa loke ta e acusacion di mal uso di funcion di minister,  Kock a splica Hof cu e no ta haya cu Sevinger a favorece ningun hende. El a bisa cu Sevinger a firma peticionnan y manda DIP manera el a haci tur momento.

MALVERSACION

Riba e acusacion di malversacion di placa,  Kock a bisa cu e no ta haya cu Sevinger a malversacion placa di Fundacion Curazon Berde. El a mustra cu segun ley, un persona por malversa placa cu e tin den su poder. Den e caso aki Sevinger no ta director di e fundacion. Esey kiermen cu e no tin poder riba e placanan. Esey ta nifica cu no por papia di malversacion. E hecho cu a laga paga ticket pa Sevinger y su señora viaha bay Miami, no ta malversacion. E president di e fundacion a traha un cheque y manda pa e compania pa cumpra e ticket. Ningun rato Sevinger a haya e cheque pa bay cumpra ticket. Ademas, Sevinger tabata paga gastonan di huur di oficina cash. E abogado ta haya cu e ticket ta un pago di un parti di loke Sevinger a paga pa oficina pa algun luna. Esey no ta malversacion. E ta haya cu mester declara Sevinger liber.

PERSECUSION POLITICO

Mr. Kock a finaliza bisando cu henter e caso ta un persecusion politico. A bay haci investigacion na cas di Sevinger, keriendo cu lo haya toilette di oro, placanan dera den cura y mas cos extravagante. “Pero nada di esey a wordo haya”. Na opinion di Kock, Sevinger ta un simpel persona cu ta trahando ainda riba su cas.