Diaranson ex doño di cacho maltrata Khaleesi tin cu presenta dilanti huez

ORANJESTAD – Diaranson mainta e homber A. Groeneveldt tin cu presenta dilanti mesa berde, pa responsabilisa su mes pa su actonan. Groeneveldt tabata doño di e cacho Blacky cu despues a haya e nomber Khaleesi y cu a bin fayece a consecuencia di herida di maltrato. Groenveldt oficialmente ta wordo acusa di, den e periodo di prome di januari 2024 te 26 di maart 2024, varios biaha y sin ningun meta y surpasando tur loke ta permiti, a intencionalmente haci un bestia (un cacho di nomber Khaleesi) dolor y/of causa e cacho herida y/of a perhudica salud di e cacho, dor di laga e cacho pa tempo largo mara na un cadena demasiado cortico y inadecua y/of a keda sin duna e cacho e cuido necesario, dor di keda sin duna e cacho cuminda y/of awa pa e bebe y/of cuido pa su heridanan y/of remedi. Ademas, e ta wordo acusa di varios biaha, den e periodo di prome di januari 2024 te 26 di maart 2024, como doño di un of mas cacho, a keda sin cumpli cu su obligacion di duna e cacho(nan) aki e cuido necesario, dor di duna e cacho(nan) insuficiente cuminda y/of di duna e cacho(nan) insuficiente awa y/of di keda sin duna e cacho(nan) cuido medico necesario di un veterinario y/of di keda sin duna e cacho(nan) suficiente espacio pa nan move.

HOPI INTERES

Noticiacla a compronde cu tin hopi interes pa e caso aki, sigur pa e fundacionan cu ta envolvi cu rescate di bestia, particularmente cacho. E caso ta programa pa cuminsa 8:40pm. Noticiacla a compronde cu e sentencia maximo pa e caso aki, ta un castigo di prizon di 6 luna largo.