Den apenas 2 siman despues di a huramenta, gobierno di St. Maarten a cay

WILLEMSTAD - Den ménos ku 1 ora despues ku parlamento di St. Maarten a aprobá kredensial di parlamentarionan Richinel Brug (URSM) i Viren Vinod Kotai (DP) notisia a drenta ku gabinete Luc Mercelina I a kai.

Despues ku a verifiká e kredensialnan partidonan di koalishon URSM, DP, NOW i URSM a disponé di tur nan parlamentarionan ku ta un mayoria di 8 asiento di parlamento. Pero no muchu despues pa medio di un kolaboradó di komunikashon di partido UP, e informashon a sali ku parlamentario pa partido NOW, Kevin Maingrette a kita su sosten for di e koalishon i alabes a firma un akuerdo di koalishon nobo ku partidonan National Alliance (NA) i UP.

NA tin 4 asiento, UP 3 i huntu ku Maingrette ta forma 8 asiento. Esaki ta duna e koalishon nobo aki un mayoria di 8 asiento den parlamento ku ta konta ku total 15 asiento. Asina a yega un fin na gabinete Mercelina I despues di apénas 17 dia.

Den e akuerdo di koalishon ku NA, UP i Maingrette a firma a indiká alabes e repartishon di karetera. Maingrette ku su 1 asiento ta haña 2 ministerio. Minister di Hustisia i Minister di Turismo, Asuntunan Ekonómiko, Tráfiko i Telekomunikashon. Maingrette mes lo bira e di 2 vise presidente di parlamento.

Partido UP di lider polítiko, Omar Ottley ku durante elekshon di 11 yanüari último a resultá e polítiko mas popular di St. Maarten, tambe lo tin 2 ministerio den e koalishon nobo: Minister di Asuntunan General ku alabes ta promé minister i minister di Salubridat Públiko, Desaroyo Sosial i Labor.

Esaki ta notabel mirando ku NA ta e partido mas grandi i normalmente ta e partido mas grandi den e koalishon ta nombra e promé minister. Tambe UP lo nombra e presidente di parlamento.

NA di lider polítiko, Sylveria, Jacobs ta haña e Ministerio di Edukashon, Kultura, Hubentut i Deporte, Ministerio di Finansa i Ministerio di Bibienda Popular, Planifikashon Urbano, Medio Ambiente i Infrastruktura. Alabes e partido lo apuntá e vise promé minister, vise presidente di parlamento i nombra e minister Plenipotensiario i vise minister Plenipotensiario.

Den e komunikado pa anunsiá ku Maingrette a bua waya ta bisa: “De un kambio polítiko signifikante ku tin hopi siudadano di St. Maarten ta selebrando, Kevin Maingrette ofisialmente a kita su sosten for di e koalishon aktual ku ta konsistí di partidonan URSM, DP, NOW i PFP. Indikando preokupashon pa un situashon di instabilidat, falta di liderato efektivo i falta di transparensia, Maingrette a anunsiá ku e ta sostené un gobièrnu nobo i mas stabil ku ta konsistí di partidonan NA, UP i su mes persona.

E echo ku na St. Maarten a dura 4 luna pa forma e gobièrnu tabata motibu pa kontinuamente a lansa duda rondó di liderato di formadó i promé minister, Mercelina. Tambe e manera kon e proseso a kana bou di mercelina i gobernadó, Ajamu Baly tabata motibu pa diskushonnan riba e lei di screening i falta di transparensia. “Tumando e paso aki, Maingrette ta demostrá su dedikashon pa superá e retonan polítiko aktual i habri kaminda pa un gobernashon mas stabil i efektivo na St. Maarten”, e komunikado ta terminá bisando. NOTA: Texto ta scirbi den Papiamento fonetico di Corsou.